ТIекхочийла долу линкаш

Къуръанца дарба до Венерчу имамо


Бусулба нехан уггар деза жайна Къуръан

Бусулба нехан уггар деза жайна Къуръан

Къуръанан гIоьнца, адаманна чуьра жиннаш арадахар бусулба дарбанашна юкъахь уггар а даьржинчех цхьаъ ду. Европехь шуьйра вевзаш ву и тайпа дарбанаш деш волу, Венерчу цхьана маьждиган имам Фаракъ Мухьаммад. ХьастагIа Венерчу университетехь лекцеш еша кхайкхина а вара иза, шен Iилманах лаьцна дийца.

„Оха шуна Къуръанца доуьйту, имдиллинчарна дарба а, къинхетам а шеца дерг, ткъа харцо лелочарна цунах зе бен хир дац“, - иштта ду Сийлахьчу КъурIанан цхьана Аятехь яздина. Цу дешнашна тIе тевжа шен дарбанашкахь йоллучу Европехь шуьйра вевзаш волу Къуръанца дарбанашдархо Фаракъ Мухьаммад.

Венерчу „Аль-Бухари“ маьждигехь имам санна болх беш волу иза тIаьхьарчу ткъе итт шарахь бусулбачу нахана дарбанаш деш ву, жиннаш лаьцначарна чуьра уьш арадохуш. Бакъду, шиннаш арадахархо я экзерцист шех алар башха ца деза Мухьаммадна. Цуо ша Къуръанца дарбадархо ву олу.

ХIора пIераскан дийнахь Венерчу „Аль-Бухари“ маьждиге сарахь 8 даьлча дIагулло иттанашкахь, наг-наггахь амма бIеннаш а дарбане сатессина баьхкинарш. Уьш Австрера хилла ца Iа, - Белгера а, Францера а, Германера а, кхечу Европечу пачхьалкххашкара а оьху шейх Мухьаммадна тIе нах, дарбане сатоссий. Дукхахьолахь цуо тIеоьцуш берш шизофрени цIе йолу синан лазар а, эпилепси а, тайп-тайпанчу депрессийн кепаш а ю. Ур-аттала къоралла а, бIаьрзе хилар а ду Мухьаммада Къуръан гIоьнца гIоле йинчу лазаршна юккъехь.

Цу стеган башхачу похIмех лаьцна хезначу Венерчу Университетехь бусулба дин хьехаран факультетан куьйгалло кхайкхинера кху деношкахь Фаракъ Мухьаммад лекци еша. Дерриге а дарба Делера ду, бохуш, дийцира цуо студенташна. Ша уггарре а чIогIа кхоьручех хIума ду, дарба деш верг ша ву аьлла нахана моттар, цунах уггаре а доккха къа - ширк, я Делаца накъост лацар, - хир дара тIаккха, ша лелош берг бахьана бен доцийла нахана дIахаийтар шена вуно мехала ду, элира цуо. Ткъа дарба, - юха а, тIаккха а, - Делера ду.

Цул совнаха, Фаракъ Мухьаммада дийцарехь, милла а иманехь волу стаг таро йолуш ву ша шена дарба дан а, я кхеттане а жиний цамгар шех ца кхетийта а. Цу Iалашонца хIун дан деза цуо иштта дийцира:

Фаракъ Мухьаммад: „Цхьа шиша оливийн даьтта а эций, - муьлха а цIенадаьккхина долу оливийн даьтта мегаш ду шуна, - цу даьттана тIехь Къуръан деша деза, ворхI-ворхIаза „Фатихьа“ а, „Аль-Фалякъ“ а, „Ан-Нас“ сураташ а доьшуш. ТIаккха цу даьттанца хIора сарахь шен доллучу дегIана массаж ян еза. Иштта хIора сарахь шен хIусамехь КъурIане ладогIа деза. Я кассета хуьлда иза, я диск хуьлда иза, я компьютер тIехь. Жимма чIогIа а хозуьйтуш, цуьнга ладогIа деза, бIаргаш дIа а хьаьбба, меттахь шена аьхна долчу агIор а ваьлла. Доллу дегI паргIат а даьккхина, садоIа деза цуьнга ладугIучу хенахь. Мел кIезга а дийнахь цкъа дан дезаш ду иза.“

Ала догIу, къаьстина тIаьхьарчу хенахь, Соьлжа-гIалахь цигарчу Iедало жиннашца къйисам лелон институт а кхоьллина, цигахь нахана дарбанаш лан долийчахьана вуно дукха и жиннийн тема нохчашлахь а йийцаре яьккхина хилар. Цхьаболчара дуьйцу, цу институтехь жиннаш арадоху бохуш, шайна тIебаьхкинчу лазархошна, къаьстина зударшна , вуно къиза етта бохуш. Бакъду, и хабарш тIечIагдина тоьшшалаш дац цхьаннгахь.

Вукхара цатешарца тIеоьцу жинницн цамгар адамех кхеташ хилар а, цунна дарбанаш деш хилар а. ХIетте а жиннаш дуйла хаар а, уьш хиларх тешар а бусулба динан баххех цхьаъ ду, уьш дацаре дан бусулбачу стеган бакъо а йоцуш. ХIунда аьлча КъурIан чохь Дала Ша аьлла а ду: “Ас жиннаш а, адамаш а кхоьллина...“, аьлла.

Цундела жиннийн цамгарш хуьлуш хилар а, царна дуьхьал дарбанаш дешначу нахехь, масала, Венерчу шейхехь Фаракъ Мухьаммадех санна, хилар а шеко йоцуш лара догIу.
XS
SM
MD
LG