ТIекхочийла долу линкаш

Оьрсийчоьнан банкашкахь ШарIан кхеташо кхолла хьахийна


Оьрсийчоьнан ахча

Оьрсийчоьнан ахча

Оьрсийчоьнан банкийн цхьанакхетаралло Пачхьалкхан Думе «Исламан финансаш» цIе йолу низаман проект кховдийна. Центробанкан дакъошлахь шарIан кхеташо кхолла оьшуш хиларан тоьшалла далийна цхьанакхетаралло.

Проектехь яздина ма-хиллара, бусулба пачхьалхашкахь лелош йолу банкийн кеп а хир ю Оьрсийчохь. Ял яккхар а, ахча барамал сов кхерама кIел дахьарна а бехкамаш бийр бу керлачу низамо, боху Оьрсийчоьнан муфтийн кхеташонан экономикан департаментан куьйгалхочо Калимуллина Мадинас.

Калимуллина: «Исламан финансаш» бохург - иза бусулба динца доьзна гIуллакхаш лелор ду. Ял йоккху гIуллакхаш магийна дац. Проценташна ахча дала а, я эца а магийна дац. Ткъа иштта, са йоккхуш, банкехь ахча дитар а дац бусулба динехь магийна. Оьрсийчохь беха бусулба нах дукха а хан ю низам тIеэцаре хьоьжу».

Ткъа ШарIо магочу кепехь ахчалелор тIеэцарехьа кхайкхам бен дуккха а хан ю Оьрсийчохь. Ши шо а ду проект кийча йолу. Иза тIеэца сихлуш бацара депутаташ. Амма хIинца хьал хийцаделла. Оьрсийчоьнна дуьхьал санкцеш кхайкхор бахьана долуш, низам чекхдалийта тарло карарчу хенахь, боху Экономикан Iилманан профессоро Батаева Бэлас.

Батаева: «Оьрсийчоьнна дуьхьал санкцеш яхаро Iаткъам бийр бу низам тIеэцарна. Финансашна тIехь гучудер ду иза. Цундела «Исламан финансаш» цIейолу низам тIаэцийта дика хьал хIоьттина. ТIаьхьарчу хенахь Москох а, кхечу кIошташкахь а Исламан экономика кхиорехьа болх бу беш. ГIезалойчоь а, Дагестан а ю оцу новкъахь. Ткъа Нохчийчохь, довза лаар доцург, гучудаьлла хIумма а дац цкъачунна».

Ткъа ШарIо кховдочу кепехь ахчалелорах хIинцале пайдаоьцуш ю Оьрсийчоьнан цхьайолу кIошташ. Ишттачех ду, масала, ГIезалойчуьра «Амаль» финансийн цIа. Ахчанца болу болх берриг а бусулба динца нийсбина компанино. Ткъа клиенташ бусулба нах хилла а ца Iа. Цунах хаа мегар ду, Оьрсийчохь гIараяла дукха хан ца оьшицла оцу системина, бохуш дуьйцу «Амаль» цIийнан куьйгалхочо Низамов Рашида.

Низамов: «Тхан клиенташна юкъахь дукха а динан гIиллакхех боьлла боцу нах а бу, кертанаш а бу. Ял ялар а, яккхар а шайна мегаш доцу дела тхо долчу богIу уьш. Амма дукхахберш бусулба нах бу. Болх а цаьрца бо оха».

Эксперташа дийцарехь, «Исламан финансаш» низам тIеэцаро шеко а йоцуш бохьур бу шен пайда. Ткъа коьртаниг, духалург оьцучу ахчанна тIе саяккха цамагар ду.

XS
SM
MD
LG