ТIекхочийла долу линкаш

ТIехьа-Мартанан кIоштарчу Закан-юртарчу школехь дешархочунна полисхоша къиза еттар дижон гIерта меттигера а, мехкан а хьаькамаш. Церан карахь болу хаамийн гIирсаш бу жимастаг бехкевеш. Амма юккъараллехь хууш ду хиллачух бакъдерг.

Кхо-диъ де хьалха Нохчийчохь уггаре а коьрта хаамийн гIирс хилла дIахIоьттинчу Ватсапехула цхьана зудчун дIахьедар даьржира. Иза дара республикан куьйгалхочуьнга Кадыров Рамзане цо дина. Закан-юртара яхархочо доьхуш дара, шен кIантана къиза йиттина болу полисхошна дан догIуш долу таIзар дар.

Бибулатова Жаннас бахарехь, цуьнан кIантан Астемирова Iадланна ЕГЭ дIаяла ваханчохь полисхочуьнца дов а даьлла, царех массийта тIе а кхетта йиттина, мара а кагбеш, мочхал а лазадеш йиттина. Нана шен кIентан бехк бац аьлла тешаш ю, полисхочо маьттаза дешнаш а дийцича, иза ца ладелла, дуьхьала цхьаъ аьлча, тIаккха йиттина цунна, боху цо.

Лулахой а, юьртахой а теш хIуьттура бу, иза муха кIант ву хаа лаахь, аьлла. ДIахьедаран бухахь шен телефонан лоьмар а йитина карзахяьллачу зудчо.

Цо гIараяьккхина йолу телефонан номер дIаяйина ю тахана. Амма цо ма баххара, юьртахой оцу кIантах хаза дош аьлла а ца Iаш, гул а белла, юьрта полицийн декъана хьалхахь гулбеллера, цаьргара хилчуьнах жоп деха.

ГIуллакх кхин гена ца долуьйтуш дIадерзийна Соьлжа-гIалара сихонца хьалакхаьчначу Iедалхоша. Чоьххьарчу гIуллакхийн министрийн гIовс Алаудинов Аптис таIзар дийра ду аьлла бехке волчунна. Прокуратуро и гIуллакх талла тIелаьцна. Дов дирзина лоруш ду.

Закан-юртахь хиллачуьнна иштта комментарий йо нохчийн журналиста Лакаева Залинас. Иза кхеташ яц, сел буьрсачу хьелашкахь хIунда дIахьош ю и экзаменаш.

Лакаева: «И ЕГЭ йолаелчхьана вайн махкахь а, Оьрсийчохь а цхьацца зуламаш дуьйлуш керланаш хуьлу-кх вайна. Ша шена тоьхна кхалхар хилла олий хаам хуьлу. Нохчийчохь, уьш къайладаккха а гIерта.

Закан-юртахь дешархочунна йиттина аьлла ду. Бераш экзамен яла даьхкинчу хенахь, цаьрга тIера схьа ца язъяйта йоккха гIовгIа яьккхина. Уьш цхьа зуламхой болуш санна, герз долу нах дIа а хIиттина, и талламш беш, тIера духарш толлуш, камераш а хIиттина, синIаткъам хуьлу. Берах латар доьналла дац».

Ша милла а велахь а, берана тIе куьг кховдийна волчу полисхочун хьокъехь таллам а бина, цунна а, цуьнан хьакаманна а таIзар дан деза аьлла хета Лакаева Залинина.

Лакаева: «Уггаре а хьалха ас оцу полисхочун хьаькам балхара дIавоккхура вара. Шен белхахочух жоп луш воцучу цо болх бан ца беза. Оцу ЕГЭна цхьацца бакъахьа агIонаш а хир ю, суна-м бIостнехьерш алсам хета. Къаьстина кху Оьрсийчохь а, Кавказехь а, коррупцийн системийца муххале а».

Бераш а, къенаберш а цхьана синIаткъаман кIелахь баьхначийн маогашаллийн хьал дика ду аьлла ца хета журналистана Лакаева Залинина. Къизалла гина долчу къоманна цхьана а тайпа реабилитаци йина а, еш а яц аьлла, билгалдаьккхира цо.

Лакаева: «2-3 де хаьлха накъосто телефон туьйхира, елха а йоьлхуш. 9-чу классера цхьа кIант, экзамен дIа а елла, цуьнан жамIе хьажа вахча, цигахь дог иккхина велла. СинIаткъам хилла ду цунна иза. Вайн адам могаш дац. Оьрсийчуьра эскархой, шай казармаш чохь дIа а ловчкъий, 3 я 6 баттахь кхузахь хилла аьлла, психикан реабилитаци ян еза олу. Ткъа дерриге а лайна а, ловш дехачу къоман могашалла галъяьлла.

Сунжа кIоштехь а цхьа йоI иштта ЕГЭ дIалуш, лаца а елла, цомгуш хилла. ХIинца, цуьнах хIун хилла ца хаьа суна. ХIун къуьйсуш ду вай? Мича кхача гIерта?».

Закан-юртахь хиллачуьнах дерг мехкан дозаналла арадаьлча, меттигерачу телехьожийло, йоккха репортаж яьккхина, йиттинчу оцу кIентан ненера а, цуьнан девешера а интервью а оьцуш.

Даш-дашера даьллера, кхин хIумма а хилла дац, боху нанас. Изза, боху девашас а.

Амма, къиза йиттина яц бохуш волу кIант ца гайтира. Гарехь, башха дIагайта тамехь хилла хир вац.

Гайта комментареш

XS
SM
MD
LG