Юьхьанца Ичкерин инарла Мунаев Iиса коьртехь лаьтта Дудаев ЖовхIаран цIарх йолу батальон бен яцара Украинерчу эскаршлахь. Ткъа гурахь Данерчу нохчаша кхоьллира шолгIаниг - Ушурма-Шайхан батальон. Европерчу «Маьрша Кавказ» шех олучу юкъараллин-политикан боламо кхайкхийра цуьнан кхоллаялар.
Хьалхарниг а санна, и шолгIа нохчийн батальон а доггах къобалйо украинахоша а, Украинин Iедало а.
Юьхьанца, Кремлан лаам кхочушбеш, Кадыров Рамзанан гонера герзахой Донбассерчу сепаратистийн могIаршка а хIиттина, украинахойх лета боьлча, цецъяьллачу Киево даржон долийра шайх нохчий баьхкина лата, аьлла. Оцу бахьанийца юкъаметтигаш шелъелла ца Iаш, оьгIучу евлира украинахойнний, цаьрца церан махкахь эзарнашкахь бехачу нохчийнний.
И хьал муха гора хIетахь, ткъа муха хийцаделира дуьйцу украинахоша Богдан Чеченский шех олучу нохчочо Мохьмада. Иза ша а ву майданхо – Киевехь Янукович Викторан Iедална дуьхьаллатта нах арабевллачу деношкахь кхечира Мохьмад цига. Шен Оьрсийчоьнан вахархочун паспорт а дагийна, хадийра цо Путинан Оьрсийчоьне юхаван некъ.
Мохьмад, Киеверчу нохчийн политикан центршкара нохчий а санна, идеологин белхахо ву. ТIеман аренашкахь, нийсса шен мостагIчун бIаьра а хьоьжуш, цуьнца кест-кеста тIемакхийссаршка а юьйлуш, лаьтта Ушарма-Шайхан батальон.
Шайн баьччин ЧIебарлойн Муслиман рогIера буьйр кхочушдеш, машенахь цхьаьнхьа боьлхуш карийна Маршо Радиона телефонехула батальонан бIаьхой. Машен нацкъаръяьккхина, саца а йина, тхоьца къамел дира тIемалочо Муслима.
Массех бутт хьалха, оьрсаша укранахошкара Дебальцево гIала йоккхуш кхелхинчу инарлас Мунаев Iисас цкъа шегара журналисташа интервью луш, хьо стенна веана кхуза аьлла хаьттича а элира изза.
Мунаев: «Со сайн декхар кхочушдеш ву, бу-кх иштта кхетам – декхар дIадалар. Тхуна хала дочу хенахь, тхуна чIоггIа гIо оьшучу муьрехь, украинахой-вежарий, кху къоман тоьллачу къонахаша гIодира сан къомана, сан даймахкана, Нохчийн Республикана Ичкерина. Оха а бина сацам и декхар дIадала, тхо дала дезарг дIалуш ду».
Кхетамашца, лехамашца дакъошка яьллачу Нохчийчоьно кеп-кепара туьду шен исторехь лелларг, леларг. Амма цхъана а нохчочун иэсера долийла дац шайн децIахь тIемаш боьлхуш, шайца белшах белш а гIортийна, Кремло махка кхуьйсучу оьрсийн эскарех леташ украинахой а эгна хилар.
Ткъа шайна динчу гIоьнан тIаламбеш шаьш дуйла украинахоша гайтина яхначу заманахь а. Цара даима а нохчочуьнга безам къадош дагадоуьйту, 1933-чу шарахь Сталинан Iедало хIоттийначу мацалло эгабечу украинахошна гIоьнехь вайнах хиллийла. Хаьа царна, хIетахь нохчий а, гIалгIай а бахьанехь денбелла шайн нах бехаш буйла вайнахалахь вайнах а хилла.
