ТIекхочийла долу линкаш

ЦIеххьана кхаьчна хаам!

Хасаров ШаIрани. Гуьйренан илли


Нохчийчохь гуьйре, 2015
Нохчийчохь гуьйре, 2015

ШаIрани Хасаров.Гуьйренан илли

БIаьстено хьестарца аьхна,
Аьхкено тIаьхь сурташ даьхна.
Баьццарчу дарийн коч хийца,
Аренаш дагахь ю хIинца.

Аьзнаш а декадеш, зевне,
Цхьа бераш дIахIитти кевне.
Дерриге карла а даьлла,
Суна а хийти «ловв» аьлла.

ДитташтIехь олхазарш дека,
Уьш сайга къамел деш хета,
Байттамал, хIай хан, ас эли,
Хьо сиха, сиха дIаели.

КхидIадерг ду хьуна дахар,
Бохуш соь, тарлур хьо нахах,
Билггала цхьа хIума мелла,
Iуьйре а ю, айаелла.

Гуьйрено илли ди дийнна,
Суна шен хьалхарчу дийнах,
Нийсархой, доттагIий лоьцуш
КIентан кIант ву деша воьдуш.

Хасаров Темуркъин ШаIрани вина Казахстанехь Кзыл-Ордан мехкан Терень -Узецки кIоштарчу Кокжиде юьртахь 1953-чу шеран 22-чу октябрехь.

Цо дешна Нохчийчохь ша вехачу Дишни-Веданарчу юьртан школехь. Цул тIаьхьа агрономан говзалла караерзош 1972--чу шарахь чекхъяьккхина Серноводскера юьртабахаман техникум, ткъа 1982-чу шарахь чекхъяьккхина хIинца Владикавказ олучу гIалахь хилла Ламанхойн юьртабахаман институт. 1972-1974-чу а шерашкахь гIуллакх дина Советан эскарехь.

Тайп-тайпана белхаш бина комсомолехь, "Колхозан дахар " Веданан кIоштан газетан редакцехь, юьртабахаман декъехь, КПСС-н Веданан райкомехь.

Дахаран доккха дакъа дIаделла хьехархочун балхана - дерриге а 25 шо, цуьнах 20 шо дIадахана юьртарчу школехь берашна хими а, биологи а хьоьхуш.

Кхоллараллин некъ дIаболийна 1971-чу шарахь. 1986 чу шарахь «Сатасаран сахьт» байтанчийн гуларехь стихийн цикл араяьлла.

1991-чу шарахь араяьккхина "Дашон хьоза" цIе йолу берийн стихийн гулар. Ехха зIе латтийна берийн "СтелаIад" журналца, баккхийчеран стихаш араевлла нохчийн журналашкахь а, газеташкахь а.

2010-чу шарахь дуьйна Оьрсийчоьнан яздархойн бертан декъашхо ву, 2011 чу шарахь "Республикан хьакъволу журналист" цIе тиллина поэтана.

Веданарчу "Керла дахар" газетехь корреспондентан цIарах болх бина цо.

Хасаров ШаIрани кхелхина 2020-чу шеран Зазадоккху-беттан (март) 22-чу дийнахь.

XS
SM
MD
LG