ТIекхочийла долу линкаш

Дешаран шо дIадолалучу муьрехь Нохчийчуьрчу школашкахь 350 хьехархо тIе ца тоьа, бохуш кхайкхадора зорбанан гIирсаша. Вукху агIор оьшуш мел дерг долуш ду, мехаза дешаран киншкаш берашна ялар биста кхаччалц аьлла кхайкхийра дещаран а, Iилманан а министралло.

Керла дешаран шо долалуш ишколашкара хьал дийцаре деш йоккха интервью елла дешаран а, Iилманан а министаро Байханов ИсмаIала.

Цо дийцарехь карарчу хенахь дешархой Iамор,кхетош-кхиор кхузахь Оьрсийчохь санна а, цхьаццайолчу доьшийлашкахь кхин а дикахо дIахIоттийна ду.

«Тхан боккха кхиам бу массо ишколашка тоъал мехаза киншкаш кхачор. Мехкан куьйгалхочо тIедилларца 20I4-чу шеран юьххьехь I миллион сов киншка а эцна, церан кхачо йинера оха».

Ишта дIахьедар дина министаро. Бакъду, кIарг а ца луш, тIехула динчу зераша гойту ишколашкахь дуккха киншкаш ца тоьаш хилар. Цхьана ишколехь бIаьрг кхетта сан кху тоьуш йоцу киншкаш дIаяздинчу кехатах. И ду ас доьшуш дерг. Дийцарехь 8-гIа класс ю хIара жайнаш ца тоьург.

Хьехархоша шаьш коьртах а яьхна шайлахь йийцаре еш ю тоьуш йоцу киншкаш. Цара бегашена а хьахош дац Iедало уьш маьхаза лур ю бохург. Мелхо а цара даре до дай-наноша теттина ахча а луш уьш эца езаш хилар. Шелковск кIоштерчу цхьана ишколера хьехархо ву цу хьокъехь дуьйцуш.

Хьехархо: «Киншкаш тоьаш яц хьуна делахь. Суна цхьана классехь 12 киншка еза-кх. Эца воьлча мел еза ю 700 сом доьху цхьаннах. Дай-наноша уьш муха эца еза?»

Дешаран а, Iилманан а министарна Байханов ИсмаIална кхачо йоллуш ма-дарра девзаш хуьлчух тера дац ишколашкара хьал. Цу доьшийлашкара хьал-де чуьра дуьйна девзачара дийцарехь, кIоштан дешаран урхалло а, ишколан директорша а, библиотекехь йолчу жарганех ерг а, йоцург а бакълена а билгал ца йоккхуш дешаран министаралле харц хаамаш дIакхачабо, йоцург а ю бохуш.

ХIуъа дийцарехь, цара иза до, и киншкаш эцар маьхькIамхоша шайна тIедожор долу дела, шайн чоьтах уьш цаэцархьама. Министро массо хIума ишколашкахь тоаме ду бохуш зевне дIахьедарш дахь а цхьаццайолчу кIошташкахь ишколаш ю дийнна классашкахь цхьа киншка а йоцуш.

II-чу классан исбаьхьаллин ирташ тIехь йолу хрестоматеш йоцуш масала. Цу кепара кхачо йоцурш кIезиг хуьлчух тера а дац, схьагарехь. Цу хьокъехь дуьйцуш ю Соьлж-ГIалин кIоштера Медент аьлла шен цIе яьккхина яхархо.

Медент: «Соьлж-ГIалин кIоштехь ГIуларахь керла ишкол схьайиллина. Эвла йистехь, нацкъара ярал совнаха кхоччуш чохь охьаховша гIанташ а дац, киншкаш а яц. Сан кIантана елларг тишьелла, тIелхиг яьлла ши киншка ю-кх.

Кхиерш эца езаш ю-кх. Дешаран министараллехь киншкаш тоаме ю бохуш кхайкхош ду. Мила хьанна пуьташ буттуш ву-м ца хаьа. Iехош верг мила велахь а, эшам хуьлуш дерш бераш ду».

Хьехархоша а, дай-наноша ечу къароца дешаран а, Iилманан а министаро басарш ца кхоош хьестинехь а ишколашкара хьал, цуо шен хастамечу къамелехь хIиттийна цхьамогIа айдаран хьаьркаш,церан метта тIадамаш а дохкуш хийца мегар ду.

XS
SM
MD
LG