Оьрсийчоь дагахь яц Шемахь жихIадхошца дуьхьалъяла, амма хир ю цигарчу Iедална гIодеш, аьлла президента Путин Владимира Си-Би-Эс «60 минот» телегойтийлина ша еллачу интервьюхь. Iамеркан Штаташа Шемарчу гIаттамхошна гIодар, низамехь ца хиларал совнаха, цхьана а кепара пайде дац, аьлла Путина ша Штатийн президентца Обама Баракца цхьаьнакхета кечлучу юкъанна динчу къамелехь.
Цхьанакхеттачу Къаьмнийн организацин Инарла Ассамблеян болх боьдучу муьрехь хила деза и цхьаьакхетар. Iамерка а, Европа саготта ю Кремло Шемарчу Iедална герзаца гIодар совдаккхарна. Ткъа Путина ша телегойтийлан хеттаршна жоьпаш луш элира, Оьрсийчоьно Асадна гIо до цигарчу жихIадхошна иза дуьхьаллаттийтархьама, амма эскарша лоцур дац цигарчу тIамехь дакъа.