ТIекхочийла долу линкаш

Бисултанов Апти

ШагатIулгаш (дагардар)

ХIацIи – бицIи – бицIахь – цIулга
Хьан дог ма ду шагатIулган
Цо дуй биъна сох ца кхета
Сан сингаттам дош ца хета
ХIацIи – бицIи – бицIахь – цIулга
Хьан дог ма ду шагатIулган

ХIацIи – бицIи – бицIахь – цIулга
Сан дог ма ду шагатIулган
И чIагIделла хьох ца кхеташ
Хьан кураллаш дош ца хеташ
ХIацIи – бицIи – бицIахь – цIулга
Сан дог ма ду шагатIулган

Хьарам – барам – цIело – гIело
Дегнаш ду вайн карахь лелош
Цкъа вай вовшийн дуьхьалкхетахь
Я эвхьаза я эхь хеташ
Цкъа хьан куьйгах сан куьг кхетахь
Я сан куьйгах хьан куьг кхетахь
ХIацIи – бицIи – бицIахь – цIулга
Зулам хир ду шагатIулгех

ХIацIи – бицIи – бицIахь – цIулга
ШагатIулго шагатIулгах
Суй баккхарна кхерам беца
Даькхнаш санна йокъа лайна
Кхарзаделла долчу вайна
И цхьа суй а тоьур беца
Кхетта сенчу цIарах дага
Ишта хIара дуьне даго

ХIацIи – бицIи – бицIахь – цIулга
Дегнаш ду вайн шагатIулган
Хьарам – барам – цIело – гIело
Зулам ду уьш карахь лелор

(Ешна Радуева Зураъа)

Апти Бисултанов вина 1959 шарахь. Апти -- гоьваьлла нохчийн кхузаманахьлера байтанча ву. 1983 шарахь цо чекхъяккхира Нохч-ГIалгIайн пачхьалкхан университетан филологин факултет. Бисултановс арахецна цхьамогIа байтийн гулам. Масала, цуьнан «Ткъесан ӀиндагӀ» гуламана юкъайоьдуш ю шуьйрра евзаш йолу поэма «Хайбахехь язйинарг». 1992 шарахь цунна делира Нохчичоьнан Халкъан совгӀат. Апти Бисултанов 2002-чу шарахь дуьйна Ӏаш ву Берлинехь.

XS
SM
MD
LG