ТIекхочийла долу линкаш

Бисултанов Апти

РагIу

дирзина мехашна агIор
дерзина лаьтта цхьа рагIу
суна мел безначу нехан
аьзнаш шен тхов кIелахь дехаш

дIадовлий дIадоьлху мехаш
схьадовлий схьадогIу мехаш
кегаеш бIаьрлагIаш нехаш
дагарадийцарехь дехаш

дирзина заманна агIор
чекх са гуш лаьтташ ду рагIу
суна мел безначу нехан
цIераш шен тхов кIелахь ехаш

дIайолий дIайоьду зама
схьайолий схьайогIу зама
кегаеш уппагIаш амалш
къегадеш Iожаллин гIама

ткъа рагIу-м лаьтташ ду рагIу
мехашна заманна агIор
суна мел безначу нехан
доIанаш тхов кIелахь дехаш

тIебогIуш некъ а бац цхьа а
тIекъовлуш неI а яц цхьа а
хIусам яц хьаша ца кхойкху
маьждиг дац молла ца кхойкху

ткъа рагIу-м лаьтташ ду рагIу
чекх са гуш массо а агIор
суна мел безначу нехан
аьзнаш шен тхов кIелахь дехаш

ишта ю со вина петар
со ваьхна со вайна четар
со суо а цуьнан цхьа аз ду
цхьа чов цхьа гIайгIане арз ду

1993 шо

(Ешна Радуева Зураъа)

Апти Бисултанов вина 1959 шарахь. Апти -- гоьваьлла нохчийн кхузаманахьлера байтанча ву. 1983 шарахь цо чекхъяккхира Нохч-ГIалгIайн пачхьалкхан университетан филологин факултет. Бисултановс арахецна цхьамогIа байтийн гулам. Масала, цуьнан «Ткъесан ӀиндагӀ» гуламана юкъайоьдуш ю шуьйрра евзаш йолу поэма «Хайбахехь язйинарг». 1992 шарахь цунна делира Нохчичоьнан Халкъан совгӀат. Апти Бисултанов 2002-чу шарахь дуьйна Ӏаш ву Берлинехь.

XS
SM
MD
LG