ТIекхочийла долу линкаш

Бисултанов Апти. ДоIа


Нохчийчоь -- божарий маьждиг чоьхь, охан-беттан 26, 2013

Нохчийчоь -- божарий маьждиг чоьхь, охан-беттан 26, 2013

ДоIа

Бисултанов Болатана

лам лекха бу аьлча ломах
аьлларг аьлла доцу дела
хIорд кIорга бу аьлча хIордах
аьлларг аьлла доцу дела
ломал лекха хIордал кIорга
нохчийн бала болу дела
со мотт сецна висна хIинца
аьлларг аьлла доцу дела

вайн дегнаш а вайн кешнаш а
цкъа бухдохур долчу Дала
цкъа бухбоккхур бу-кхa хIара
нохчийн къоман беза бала
ишта ойла йина ас а
кхачадича дош а аз а
кхачадича дегI а са а
Деле велха дезна сан а

Хьоьга деха хьакъ а волуш
доьхуш вац со Везан Дела
Хьуна хьалха бакъ а волуш
доьхуш вац со Везан Дела
байлахь бисначеран цIарах
доьху Хьоьга Везан Дела
жоьрахь бисначеран цIарах
доьху Хьоьга Везан дела
кIур хаьддачийн цIарах Хьоьга
доьхуш ву со Везан Дела
хIу хаьддачиин цIарах Хьоьга
доьхуш ву со Везан Дела

Тхан массеран кIур хадахь а
ХIу хадахь а Везан Дела
Тхан къонахийн хIу ца хеда
беркат лохьа Везан Дела

Кхунах тера

Апти Бисултанов вина 1959 шарахь. Апти -- гоьваьлла нохчийн кхузаманахьлера байтанча ву. 1983 шарахь цо чекхъяккхира Нохч-ГIалгIайн пачхьалкхан университетан филологин факултет. Бисултановс арахецна цхьамогIа байтийн гулам. Масала, цуьнан «Ткъесан ӀиндагӀ» гуламана юкъайоьдуш ю шуьйрра евзаш йолу поэма «Хайбахехь язйинарг». 1992 шарахь цунна делира Нохчичоьнан Халкъан совгӀат. Апти Бисултанов 2002-чу шарахь дуьйна Ӏаш ву Берлинехь.

XS
SM
MD
LG