ТIекхочийла долу линкаш

Батаева Хеда. Букъ нисбеш гIаьттина


Нохчийчоь-Омра дина дицдан кинон дакъа

Нохчийчоь-Омра дина дицдан кинон дакъа

Батаева Хеда

Букъ нисбеш гIаьттина

БIаьста бIаьрга малх бахна бIарзъелла со Iуьллу моьттурш,
Iай лерга мох бахна къаръелла со Iуьллу моьттурш,
Цхьа меже йойча сан, кхин дIаерш дIасевцца моьттурш,
Схьахьовсал хIоккхузе бакъ ду-дац и шайна моьттурш:

КIайн-Iаьржа къасталуш сан бIаьрса долуш ду шуна,
ЖIалин "гIов", стеган аз къасталуш лерса ду шуна,
Цхьа меже йойначохь кхин меже тIеялла шуна,
Цкъа охьакхеттехь а, букъ нисбеш гIаьттина шуна!

ДIакъайладахалаш, лаьхьарчий, шайн сийна кортош,
Белшаш чу озалаш, хIай кIиллой, шайн осал вортош.
ТIулган тIехь лар юьтуш со новкъахь йогIуш ю шуна,
Дешан даш Iенадеш иблисан леш бежа шуьне.

Хиламийн догIано шун гIамар-гIаланaш херцош
ТIедогIу чкъурана гург хилар тоьуш ду суна,
Аш къобал бинчара неIарех шу аралестош,
Шайхалла доццушехь, шал шера схьагуш ду суна.

Цкъачунна Iе шайна стогалла мел йолчу стеган
Амалехь, аматехь сийсазван бахьанаш лоьхуш,
Тахна аш, харцо еш, Iовдарах нийсонан легаш,
Шу кхана текхар ду, кхечарга и нийсойоьхуш.

2014

Батаева Хеда йина 1970-чу шарахь, хьалха СаIди-кIотар олуш хилчу, хIинца ГIойчу олучу юьртахь. Чекхъяьккхина Соьлж-ГIалийн хьехархойн училище а, Нохчийн Пачхьалкхан Университетан филологин факультет а. Дуьххьара зорбане яьлла 1984-чу шарахь "Орга" альманах тIехь.

XS
SM
MD
LG