Сулейманов Ахьмад
Ма ала соьга
Бовхачу безамца
Хьайга дог кхийдаш,
Хьо ца гуш дахна де
Кхоьлина хеташ.
Мацалла, хьогалла
Хьо йолчохь йицлуш.
Хьо езначуьнга ахь
Йицъе ма ала!
ХIара дуьне дита а
Хир ву со реза,
Амма со дуьненчохь
Мел веха гIоза,
Самах а, гIенах а
Хьо сайна езар
Далхадеш вехар ву:
Йицъе ма ала!
ШалгIа мотт вайшинна
Юкъе ма буьйли,
Соьцара хьан безам
Шелбелла бели
Сан даго тIаьххьара
Хьоьга мох эли:
Сан безам, соьга хьо
Йицъе ма ала!
Сан бIархих, сан дуйнех
Хьо ма ца кхийти.
Езар сов мел дели,
Со хийра хийти.
Шелделла тIулга дог
Ахь суна гайти,
Сан безам, соьга хьуо
Йицъе ма ала!
Сай кийра йижий ахь
И Iаьржа буьйса,
Вити ахь со хьайга
Къайлах сатийса.
Ахь суна дихкина
Хьо йолчу хьийзар
Сан безам, соьга хьуо
Йицъе ма ала!
Ахь алахь кийча ву
Лекха лам ахка,
Кийча ву хьо лоьхуш
Вала а акха.
Ма таса вайшинна
Юккъе ахьа мекха,
Сан безам, соьга хьуо
Йицъе ма ала!
Реза яц хьо соьца
Сан безам бекъа,
Вехар со валлалца
Безаман шовкъехь.
ХьагI йоцу сан безам
Хьанна бу новкъа?
Сан безам соьга хьуо
Йицъе ма ала!
Валлалца хьо йицъян
Хир вац со реза,
Хьуна со ца везарх,
Суна хьо еза.
Вайшинна метта хьо
Ехийла гIоза,
Сан безам, соьга хьуо
Йицъе ма ала!
