ТIекхочийла долу линкаш

ЦIеххьана кхаьчна хаам!

Яндарбиев Зелимха. Сайн ойла


Нохчийчоь --Соьлж-гIалахь
Нохчийчоь --Соьлж-гIалахь

Яндарбиев Зелимха

***

Сайн ойла, синхаам ца хIуттуш хьоьга дIабийца,
Йочане, йоькхане денош вайн хийла дIаидда.
Ткъа царех тахана сан дагна буха хIун дисна? –
Сингаттам, сатийсамаш, дагалецамаш шийла.

Амма ца воллу со тахана я уьш а лера,
Синтемах хийца а ца гIерта лазам а церан.
Сан даго кхин лоьху – хьан хазахетаран серло,
И цунна оьшуш ю, малх санна, зезагаш дело.

Хьан елакъажаро луш дегайовхо, со веха,
Вуй-те со ирсениг я кхардам кхаьчнарг ву нехан?...
Сан даг чохь зезагах гIоттур ду хьан хазахетар,
ТIулг хилла, дужур ду муьлхха а хьан халахетар…

Яндарбиев Зелимха (1952-2004) гоьвала нохчийн байтанча а, яздархо а, политик а вара. Яндарбиев Зелимха вина I952-чу шарахь гезгмашин беттан 12-чу дийнахь. 1981-чу шарахь Нохч-ГIалгIайн университетан филологан (нохчийн мотт а, литература а) факултет чекхъяьккхира. 198I-1982 шерашкахь дуьхьара байтийн гуламаш арахийцира. 1984-чу шарахь ЧИАССР-ан яздархойн бертан декъашхо хилира, ткъа 1985-1986 шерашкахь СССР-ан яздархойн бертахь болхбира. 1987-1989 шерашкахь дийшира Москох Горкий цIарах лаккхарчу курсашкахь. 1989 шарахь литературан хьехамча санна болхбира ЧИАССР-ан яздархойн бертахь. Цу шарахь дуьйна “Барт” политикан организацин гIаьнтда а вара.

Нохчийчуьрчу маршонан боламан жигара декъашхо вара Зелимха. 1996-1997-чу шерашкахь Нохчийн Республикан Ичкерин президентан декхарш кхочушдира. Оьрсийчоьнан эскарашна дуьхьал тIамехь дакъалецира 1994-1996-чу шерашкахь. 2004-чу шарахь Оьрсийчоьнан къайлах сервиша Дохехь терроран акт йина вийра Яндарбиев Зелимха.

XS
SM
MD
LG