ТIекхочийла долу линкаш

Ахматова Раиса. Корталех-м хьерчар ю...


Белорус -- Безаман туннел Украинехь

Белорус -- Безаман туннел Украинехь


Корталих-м хьерчар ю, шеллуш, Iай санна,

Амма дац сан белшех кортали - кIац ю.

Къийлало-кх, хьомениг, хьо даиманна...

ХIунда ву хьо ишта, хьуо везаш хилча?

Кхечунна дакъа а цкъа а хир доцуш,

Хьан цIе ю даима сан деган эла...

Ткъа хIунда вац-те хьо и дог сан хьостуш,

ХIунда ву хьо ишта, хьуо везаш хилча?

Iай хьоькху мох санна, шийлачу даг чохь

Безам а, я цIе а кхин йоцуш санна...

Эцахьа соьгара, хьайна ца тоьъчахь, -

ДIалур ду дерриг а, везарна сайна!

ХIунда ца лаьа-те даггара хьуна,

Эсала вистхилла, сох дагавала?

Хуъушехь оццул хьуо везийла суна,

Хьо ишта хIунда ву, хьомениг, ала?!

Ахматова Раиса йина 1928-чу шеран гIуран-беттан 13-чу дийнахь Соьлж-ГIалахь. 1943-чу шарахь цо чекхъяьккхира Соьлж-ГIара хьехархойн юккъера доьшийла. 1958-чу шарахь иза деша яхара Москох СССР-н яздархойн Бартехула йолчу Лаккхарчу литературан курсашка. Уьш чекх я яьхна, цIа еанчул тIаьхьа Азматова Раиса Нохч-ГIалгIайн респубдикан синбахамаллин министран куьйгаметта хIоттийра. Иза Нохч-ГIалгIайн АССР-ан яздархойн Бертан гIентда а яра (1961-1983), ЧИАССР-н Лаккхарчу Кхеташонан гIентда яра (1963-1985). Цо язйина иттанаш книшкаш ю зорбанеяьхна. Цуьнан байташ дуккха а меттанашкахь арайийлина. Иза цхьаъ бен нохчийн зуда яц "Нохч-ГIалгIайн республикан къоман поэт". Цхьаболчу талламхошна хетарехь цуьнан кхоллараллин белхан ерриг архива (600 сов папка) Оьрсийчоьнна - Нохчийчоьнна (1994-1996) хьалхарчу тIамехь егира. 2012-чу шарахь Ахматова Раиса а, Жумалаева Лулала дуьненан зударийн анталоги юккъетоьхна нохчийн поэзин векалш санна. Шен дахаран тIаьхьарчу шерашкахь цо куьйгалла дира Совет Пачхьалкхан синбахамаллаин фондана. Ахматова Раисан дуьненан некъ хедира 1992 шеран 29 дечкен-беттан дийнахь.

XS
SM
MD
LG