Маршо Радио: «Карабахехь летарш совцо бина барт боллушехь, азербайджанхоййнний, эрмалойнний эскарш юха тIаме хIиттарх лаьцна хьуна хIун хета?
Де Ваал: «Вуно кхераме инцидент дера ю. Доьхнарг ду, ши агIо дуьхь-дуьхьал лаьттачу дозанехь вуно дукха герз IаьIна хилар. Кеманаш, чохь лелош стаг воцурш а тIехь, беракеманаш, кхидолу деза герзаш. ТIом сацо бина барт бохориг, даима а санна, политиках дозу бахьана ма хуьлий. Шашах а дац Iедалан вертикал политике ерзар.
Маршо Радио: «Малхбалерчу цхьаболчу тергамчаша Оьрсийчоь ю олу шина пачхьалкхана юкъа питана теснарг. Оьрсийчоь шен бартбаран ницкъашца юкъагIорта тарло. Хьуна хетий оцу ирчачу ловзарийн дай Москох бу аьлла?
Де Ваал: «Суна иза дац аьлла хета ишта. Конфликтан коьрта декъашхой шаьш Эрмалойчоь а, Азербайджан а го суна. Ткъа Кремл могIара актер ю цу хьолехь. Оьрсийчоьнан цIарах маслаIат дан гIертарг Лавров Сергей ву (Оьрсийчоьнана арахьарчу гIуллакхийн министр). Иза кхета барт оьшийла. Бакъду, Эрмалойчохь, дукха дацахь а, оьрсийн эскар ду, ду азербайджанхойн дозанца а – Дагестанехь – амма ша Азербайджанехь дац. Делахь а, Оьрсийчоь юкъагIертар ю шен ницкъашца аьлла ца хета суна. Лавровс долчу хьолах Путине дIахоуьйтуш а хир ду, гарехь.
Маршо Радио: «Кху деношкахь Европехь кхерамзалла латторан а, юкъахьболхбаран а организацино цхьаьнакхетарш ду Карабахера хьал луьстуш дIахьош. Оцу барамо маслаIат дийр ду аьлла хетий хьуна?
Де Ваал: «Украинера тIом сацорхьама Минскехь бартбечу заманахь санна таронаш яц тахана оцу организацин. Иза цкъачунна тIемашка йоьрзуш лаьттачу шина пачхьалкхан президенташца болхбеш ю. Тийсадаларш совцо а гIерта. Дикка хьолана тIеIаткъам бан таро ю Москохан, иштта Ваашингтонан а. Хала хир ду дов сацон. Ткъа Европехь кхерамзалла латторан а, юкъахьболхбаран а организацин 6 тергамча бен вац оцу регионехь. Бартбан хьажийна дуьненаюкъара машарбархой а бац. Амма Карабах къоман интерес ю шина а мехкан, Эрмалойчоьнан а , Азербайджанан а. И ший агIо а ю Оьрсийчоьне дика ладугIуш.
Маршо Радио: ТIом сацийча муьлхачу агIонна хуьлу -те эшам, ша оьшу и сацийча аьлла хетачо хIун дан деза?
Де Ваал: «Цхьа а политикан сацам а боцуш, тIом сацор Азербайджанна хетар ду эшаме. Цара шайгара шайн латта дIадаьккхина ма лорий. Оцо гойту политикан процесс вуно оьшуш юйла. Ткъа и процесс дIагIур яц Москох а, Вашингтон а юкъаролоне ца ялахь. Амма оцу шина шахьарна атта а дац вовшашца шайлахь барт каро а. Цундела Азербайджано а, Эрмалойчоьно а къасто деза муьлш царна тов юкъарло лелош.