ТIекхочийла долу линкаш

ЦIеххьана кхаьчна хаам!

Сулаев Мохьмад. Адамалла.


Нохчийчоь --тIеман шераш
Нохчийчоь --тIеман шераш

АДАМАЛЛА

Вайн ломахь дастаме

Лерина хьаша,

Нагахь цкъа хIума ша

Йиъначул тIаьхьа

И велахь юха а

ТIеийзош кхача,

Тхьамда а шуьн тIера

Ваьллашехь вуха.

Вайн дайша дукха луьйш

Лерина къонах,

Нагахь, цкъа къамел ша

Диннашехь пхьоьханахь,

Бистхила кхиазнаш

Боллушехь гонах,

Юха а, цIеххьашха,

Цо шена дош дехахь.

Нийсса цкъа топ тоьхна,

Цо экха дожадарх, –

ХIетте а иччархо

Стешха ма лерина,

Iуьллучу экханна

ШолгIа а топ тохахь, –

Кхерарна цо шена

Цхьаъ дарна цIеххьана.

Вайн юьртахь бере а

ХатI доцуш хетта, –

Iодика цкъа йина,

Ваьллашехь говра,

Воьссинехь нах болчохь

Юха и лаьтта –

Схьаэца лаьттара

Шен доьжна йовлакх.

Амма вай девллачу

Яхь йолчу лаьмнашкахь

Бехказа иштанаш

Битна а, боху,

Нагахь шайн некъашкахь

Цара дIалелийнехь

ГIиллакхаш, вайнехан

Ламастца догIу.

Дастаме цкъа а

Ца лерина хьаша,

Вуьззиншехь, шолгIа а

Шуьне и хаарах,

Нагахь шел тIаьхьа чу

Веана хьаша

Юучух кхетийта

И цуьнца охьахаахь.

Вайн дайшна дукха луьйш

Ца хетта къонах,

Нагахь цкъа къамел ша

Диннашехь пхьоьханахь,

ШолгIа дош, собаре

ДIасхьаьжна гонах,

Тхьамдина баркалла

Ала цо дехнехь.

Иччархо стешха а

Ца хетта ломахь,

Нагахь, цкъа топ тоьхна,

Дожийнчу экханна

ЦIеххьашха хьажийна,

ШолгIа топ тохарх, –

Цо хьоьгу лен бала

Бацбан лаарна.

Вайн юьртахь бере а

ХатI доцуш ца хетта,

Iодика цкъа йина,

Хиъннашехь говра,

Воссарх и юха а

Говрара лаьтта,

Охьайоьжна къеначун

Iаса дIакховдо.

Вайн нана-лаьмнашкахь

Вайнаха уггар

Лакхара лерина

Собар, стогалла,

Делахь а царел а

Лакхара гуттар

Вайнаха ма лору

Бакъ адамалла!

Гоьваьлла нохчийн яздархо а, байтанча а Сулаев Мохьмад (1920 - 1992) вина 1920-чу шеран гезгмашин-беттан 20-чу дийнахь ГIойтIахь. 1941-чу шарахь Мохьмада чекхйоккху Бакура лоьрийн институт. Лоьралла а, яздархочун болх а цхьаьна дIакхийхьира цо. М.Сулаевс дуьххьарлера шен байташ язйира 1935-чу шарахь. Кхоллараллин хьалхара мур чекхболу 1943-чу шарахь «Малх тоьлур бу» поэма язъярца. 1958-чу шарахь «Безаман эшарш» цIе йолу стихийн гулар араяларца дIаболало поэтан кхоллараллин керла мур. ХIетахь дуьйна цо арахоьцу поэзин, прозин дуккха а книгаш: «Велларг денвар», «Даймехкан зIаьнарш», «Товсолта ломара дIавоьду», «Дагчуьра суйнаш», «Бакъдерг», «Адамалла», «Сирла суьйре»… Поэтан кхалхар хилла 1992-чу шарахь.

XS
SM
MD
LG