ТIекхочийла долу линкаш

Хьо волчу йогIу со

Ахматова Раиса

Хьо волчу йогIу со

Ламанан новкъа,

Кераюкъ лепачу

Седанах юьзна.

Дуьххьал-дIа хьо лела

Некъ серлабаккха,

Йохьу ас седанан

Серлонан хазна.

Буьрсачу дарцо хьо,

ДоттагI сан, шелвахь -

Сихлур ю, малх хилла,

Со юххе яла.
Хир ю сох Iуьйре а -
Ойлано гIелвахь,
Буьйса а санна, хьан
ГIайгIа дIалалла!

Некъ бечохь мох-дарц а
Нислуш ду хийла.
ДогIано хьовзавахь,
Сан цIе ахь яккха, -
ГIоттур со, бIаьстенан
СтелаIад хилла,
ДогIано тIадорах
Хьо хьалхаваккха.

Хьаглой хьо, - ламанан
Шовда а хилла,
Хьо волчу хьодур ю
ТIулгашна юккъех.
Нагахь хьо къовсамехь
ГIо оьшуш хилча,
Орцах со кхочур ю -
Ларор ду вайша.

Хьо волчу йогIу со
БIаьстенах, эсал,
Цхьана а халонах,
Дарцах ца кхоьруш.
Даггара тешалахь:
Хир яц со осал,
Къонахчун некъаш ас
Хьоьца дIакхоьхьуш.

Ахматова Раиса йина 1928-чу шеран гIуран-беттан 13-чу дийнахь Соьлж-ГIалахь. 1943-чу шарахь цо чекхъяьккхира Соьлж-ГIара хьехархойн юккъера доьшийла. 1958-чу шарахь иза деша яхара Москох СССР-н яздархойн Бартехула йолчу Лаккхарчу литературан курсашка. Уьш чекх я яьхна, цIа еанчул тIаьхьа Азматова Раиса Нохч-ГIалгIайн респубдикан синбахамаллин министран куьйгаметта хIоттийра. Иза Нохч-ГIалгIайн АССР-ан яздархойн Бертан гIентда а яра (1961-1983), ЧИАССР-н Лаккхарчу Кхеташонан гIентда яра (1963-1985). Цо язйина иттанаш книшкаш ю зорбанеяьхна. Цуьнан байташ дуккха а меттанашкахь арайийлина. Иза цхьаъ бен нохчийн зуда яц "Нохч-ГIалгIайн республикан къоман поэт". Цхьаболчу талламхошна хетарехь цуьнан кхоллараллин белхан ерриг архива (600 сов папка) Оьрсийчоьнна - Нохчийчоьнна (1994-1996) хьалхарчу тIамехь егира. 2012-чу шарахь Ахматова Раиса а, Жумалаева Лулала дуьненан зударийн анталоги юккъетоьхна нохчийн поэзин векалш санна. Шен дахаран тIаьхьарчу шерашкахь цо куьйгалла дира Совет Пачхьалкхан синбахамаллаин фондана. Ахматова Раисан дуьненан некъ хедира 1992 шеран 29 дечкен-беттан дийнахь.

XS
SM
MD
LG