ТIекхочийла долу линкаш

Батаева Хеда

***

секха Iад санна
сакх хилла синош
дIауьду цхьанхьа,
тIаьхьауьду къинош,
азаллехь дуьйна
ца кхеташ шайна
шаьш лоьхурш дуйла
шайн ирсе гIенаш...

хазачех дисна,
дикачех дисна,
къонахех дисна
хьо маьлхан дуьне,
безачех ваьлча,
бевзачех ваьлча,
оьшучех ваьлча
доьрзу хьо уьне...

хьо, тесна диттал,
хала ду даа,
бакъдерг а, литтал,
хала ду хаа,
амма шу шиннах
бакъо яц вада,
секхачу сино
хIаллакдо адам...

харцонца верг ша
тоьлла а ваьллехь,
ямарта волчуьн
дош лелла даьллехь,
ас кераюккъехь
яздийр ду туьрца,
хIокху дуьненахь
суо эшна, аьлла.

жIаьлин ха доцуш
мостагIа вижжалц,
чIирхошца цхьаьна
вай шуьне хийшшалц -
ца тоьлла харцо,
со лела тешна,
толамехь вац и.
со а яц эшна.

2016

Батаева Хеда йина 1970-чу шарахь, хьалха СаIди-кIотар олуш хилчу, хIинца ГIойчу олучу юьртахь. Чекхъяьккхина Соьлж-ГIалийн хьехархойн училище а, Нохчийн Пачхьалкхан Университетан филологин факультет а. Дуьххьара зорбане яьлла 1984-чу шарахь "Орга" альманах тIехь.

XS
SM
MD
LG