Таро хилча хIун дара уггар хьалха ахь дендерг? Бахархоша цу хаттарна лучу жоьпашлахь дика го могIарерчу нахера а, махкара а хьал.
Махкахь долчу хьолах, нохчийн Iар-дахарх официалан тIегIанахь Iедалхоша а, церан аьллар-лаамца хаамийн гIирсаша дуьйцург а, кхуллуш долу бIаьрла сурт а массарна а девзаш ду.
Цхьаьнгге дехарш дан а, цхьа-а ир-кара хIитто а хьашто а йоцуш, могIарерчу нахера а, цуьнца цхьана махкара а бакъ хьал довза, тхуна зеделла ма-хиллара, дагахь доцчу кепара аьтто бан тарлуш хилла, юьхьанца хьанна а бехказа а, атта а хетачу хаттаро.
Масала моттане а ца моьттура "Хьайн таро хилча уггар хьалха ахь дендерг хIун дара" бохучу хаттарна могIарерчу наха деллачу жоьпаша Нохчийчуьра Iар-дахар сел башха а, дуьззина а гойтур ду.
Цара «дагардийцарехь» гучудолу адам кхузахь мел токх ду а, синтемечу, ирсечу дахаран теш ду а.
Шен таро хилча угар хьалха ша дендолчух ишта дийцира Соьлж-ГIалин кIоштерчу ялх беран дас Аламбека.
Цо дийцарехь ткъех шо ду иза, кхин "ва дела" аьлла самалха дала меттиг боцуш,дIалург хIума а оьцуш
Аламбек: « Ас уггар хьалха сайна тIера декхарш дIалур дар-кх сайна тIера. Ламаз, марха, кхабар, ХьаьжицIа вахар оцу парзанел деза ду боху декхар дIадалар. Ас и декхар тIера доккхур дара хьалха. Ткъех шо ду-к со декхарех ца валалуш вехаш волу. Кху системано, дахаран дикалло охьатаIийна латтаво-кх со. Чоь юьззина чохь доьзал а бу, амма цу декхарех валалуш а вац-кх.
ШолгIа ас дендерг дара, сайн куьг кхочехь мел волчу мискачу нахана гIодар…»
Хууш ма-хиллара, кхузахь дукха нехан пенсеш дIа ца кхочуьйтуш совцийна, цхьацца харцо-хьарамлонашца хIиттийна хилла бохуш.
Царлахь, дийцарехь, дукха бу банкашкара кредиташ а оьцуш, пенсеш даьхнарш а. Царна, даккхий зенаш хиллачарна, гIо дийр дара ша шен ницкъ кхаьчча боху, СоьлжагIалахочо Iалавдис.
Iалавдис: «Банкашкара даккхий ахчанаш а эцна пенсешка баханчу нахана гIо дийр дар-кх ас. Пенсеш совцийна, банке ахча охьадилла таро яц. Церан къа мича даха деза? Ас царна гIо дийр дар-кх».
ДIа меттахбаьхначех дукхахболчара далхош дерг ду дан хIума цахилар, берриге а бохург санна эшам болх цахиларо беш хилар. Царех ю ши шо хьалха Ставропол махкара схьаеъна Новр кIоштера Рукъидат а.
Рукъидат: «Ас пуьташ а ца буьттуш нахана болх-некъ хуьлуьйтур бар-кх. Кху чохь дерг цхьа а дош доций хиъна-кх суна Ставропол махкара схьаеъначул тIаьхьа. Сайн таро хилча, уггар хьалха, гIийлачу нахана гIо-м дийр дара ас. Уьш кхузахь дукха а бу-кх!»
Забаренна а доцуш, Iаламат чIогIа нахехь гIело яллориг а, церан де эшийнарг а болх цахилар лору хIора шолгIачу вахархочо.
Нохчийчуьра а, могIарерчу нахера а бакъ хьал довзуьйту Шелковск кIоштерчу, 30 шарахь сов хьехархочун даржехь къахьегначу вахархочо Султана.
Султан: «Нахана белхан меттигаш нисьян хьожур вар-кх со. Нохчийчохь белхашца долу хьал вуно ледара ду. Ледара муха ца хуьлу йина фабрика а я завод а йоцуш. Даладелла хьал ду бохуш дIахьедарш –м до юкъ-кара. ШолгIа, ас дендерг хьехархошна а, лоьрашна а алапаш тIетухуьйтур дар-кх ас. Юучунна, юхучунна гIайгIа а йоцуш, цара тIетаьIIа шайн болх бийр болуш хьелаш кхолла дезара.
Кхин ас хIун дара аьлча, хIусамаш йийр яр-кх гIийла бохкучарна а, хIинцца кхоллабеллачу доьзалшна а".
Къамелаш мел динчу бахархойн къамелехь билгалдолуш юкъара цхьа хIума а дара –массара а бохург санна, шайчул хьалха ойла йора кхечеран, шена санна даггара царна дика болх хуьлийла а лууш. Къамел шен гIаддайначу дахарх долийнехь а, царех ю Соьлж кIоштера Минга а.
Шайгарчу а, махкарчу а хьолах, таро хилча и хьал хийца шаьш дендолчух дийцийна могIарера бахархой сатуьйсуш бу, болх-некъ болуш, миска, гIийла бохкучарна, хабарца а доцуш, деш гIо а долуш, шайна хетарг дIаала, шен ойла-хьажам кхечеран кхеле билла, хIора а стаг маьрша а волуш, шайн дахар битаме даре.
Бакъду, и гIийла дегайовхо дахаре маца йоьрзур ю ала хала ду
“Маршо Радион” доттагIий, шун аьтто бу тхан Facebook-ерчу аккаунтах пайда а оьцуш, тхан дискуссехь дакъалаца. Шун комменташна модераци ян эшарна, уьш сайтехь жимма тIаьхьо гучуевр ю. Нагахь санна тхоьга яийта шайн видео а, аудио а материалаш елахь, шун аьтто бу иза кху телефонца WhatsApp-e я Viber-e схьаяийта: 420 724 019832