Шемарчу Идлиб провинцехь бомбанаш йиттина Оьрсийчоьнан тIеман кеманаша. Вийна лаххара а 21 маьрша вахархо. Царна юкъахь лаххара а 3 бер а ду.
Шемахь хуьлург тидамехь латточу шемахойн бакъонашларъярхойн центро бинчу хаамца, Кафранбел олучу эвла тоьхна и бомбанаш. Чевнаш хилла нах а бу цигахь. Франс-пресс агенталло дийцарехь, «бомбанаш тоьхна ялхозза хIусамашана а, меттигерчу базара а».
Идлиб провинцехь изза цIе йолчу гIалана а, цунна гонах йолчу ярташна а Iуналла деш ю цхьаьнакхетта оппозицин тобанаш.
Оьрсийчоьнан тIеман кеманаш бомбанаш а етташ, Алеппо схьаяьккха гIерташ ду Асадан эскарш. Алеппон цхьайолу кIошташ цкъачунна карахь ю оппозицин тобанийн.
