ТIекхочийла долу линкаш

«Кремлана гΙенах а гур дац ша Кадыров вохош»


Кадыров Рамзан, Нохчийчоьнан куьйгалхо

Кадыров Рамзан, Нохчийчоьнан куьйгалхо

Оьрсийчоьнан цхьамогΙа хаамийн гΙирсашкахь даьржина, президент Путин хийца дагахь ву Къилбаседа Кавказерчу мехкийн дай, аьлла. Гарехь, бух болуш а ду и къамелаш. ХΙунда аьлча, шо гергга хан бен ца йисина Сочи-гΙалара Олимпиада схьаелла, ткъа Кавказехь лекъаш дац тΙематасадаларш, Ιедална дуьхьаллаттар.



ТΙедогΙучу шеран Ιаьнан Олимпан ловзаршна, кхеташ ду, йоккха компромат ю дуьненан спортан барамаш шен аренашкахь тΙеоьцун йолу ерриг а Къилбаседа Кавказ. Шен Краснодар-махкан бен яц Олимпиадана кхерамзалла хилийта гарантеш. Ткъа иза а тΙех кура къамел нисло, дехьа-сехьара ловзарийн баннашка боьду ломан некъаш мел кхераме бу хΙинца а, ойла йича.

Къилбаседа Кавказ юьззина олалле ялор – иза цкъачунна хаза гΙан бен дацахь а, хΙинцале а гуш ю Кремло цу тΙе йоху гΙулчаш. Хьалхо хийцина Дагестанан куьйгалхо – Магомедов Мохьмадсаламан метта хΙоттийна Абдулатипов Рамазан. Бакъду керланиг хΙинца а чΙагΙванза ву даржехь, цунах цкъачунна ханна хΙоттийнарг бен а ца олу. Дукха а политикан тергамхойн шеко а ю иза даржехь вуьсур ву бохучух.

Стенна? Кремлан Кълбаседа Кавказера политика шерашкахь зуьйчунна го Путин Владимиран кредо ю уггаре а хьалха кавказхой ницкъаша, тоьхна, кхерийна муьтΙахь бан. Цхьана агΙонна иза мелла а далуш схьадахьаш хΙума а ду. Амма дац дуьззина чекхдолуш.

2014-чу шеран Ιаьнан Олимпиада тΙекхачале хуьйцур болучех лору политологаша ГΙалгΙайчоьнан а, ГΙебарта-Балкхаройчоьнан а куьйгалхой – Евкуров Юнус-Беккий, Каноков Арсенний. Царна бехке до уьш гΙаттамхошца-радикалисташца тΙех буьйда хилар, бехке до Нохчийчохь Кадыров Рамзан а санна, шаьш а герз карахь дуьхьалончий байъа лаьмнийн чΙажашка лелаш ца хилар.

Хинболчу хийцамийн прогноз иштта йо Москохарчу политикан талламийн Карнегин цΙарахчу центран куьйгалхойх волчу Петров Николайна.

Петров: «Олимпан ловзарш тΙекхочуш Кремлана тΙоьхула дΙа хилла а, паргΙато хуьлийла лаьа Кавказехь, тΙаьххьарчу шерашкахь лагΙъелла а йоцу терроран проблема а йижош йижаяллачул. Кхетош хила деза, Кремло регионехь паргΙато а ю, халкъаш реза а ду аьлла гайта лууш, мехах оьцуш ю и цигара паргΙато. Мах ло йолуш йолчу политикан а, къоман а элиташна. И тактика ойла йина хаьржина а хила тарло, амма цо дов эккхарна кхерам а бохьу – меттигерчу политикан элиташний, бухара башхаллаш а ца евзаш юьстахара цига дΙажечочу ницкъахошний юкъахь».

И ши куьйгалхо хийца тарло Кремло оцу бахьанийца, ткъа берраш а куьйгалхой хуьйцу хан яц оццу Олимпиадаца доьзна – хьашт дац Кремлана рогΙера кегари эккхийта, аьлла хета Карнегин центрерчу Петров Николайна.

Цунна хетарехь, Евкуров, Каноков я кхечу мехкийн куьйгалхой хийцича а хуьйцур вац Путина Нохчийчоьнан куьйгалхо, боху цо. Иштта ю цуьнан аргументаш а.

Петров: «Кадыров Рамзанах дерг аьлча, Оьрсийчохь вайн беккъа шайх хьаькамех йозуш ши режим ю. Цхьаъ –Путинаниг, шолгΙаниг - Кадыровниг. Кадыров хийцар Кремлан карахь а дац. Цундела и хΙума хьехош а дац. Кадыров шатайпа гарант ву Нохчийчуьра хилла а ца Ιаш, ерриг а Къилбаседа Кавказера хьал олаллехь латтон некъ луш. Цундела Кремлна Ιовдалчу гΙан-набаршкахь а гойла дац Кадыров нийсонца я кхечу бахьанийца хуьйцуш».

Газеташа, телевизионаша Кавказан хьаькамаш хийца болорах лаьцна иккхина гΙара яьржаш бен а яц. Амма гуш ду хьаькамаш хуьйцу аьлла хаам бинарш, оццу хьостанаша чΙагΙдарехь, ницкъаллин урхаллийн дай хилар. Меттигера мехкийн даййий, тΙебаьхкина Оьрсийчуьра эскархоййий вовшашца гамлуш дуккха а нисло Кавказехь, эскархоша халкъана тΙехь кест-кеста эрадоккхуш хиларна. Ткъа оцу къовсамехь тоьллачух тера ду ницкъахой. Хазачу дашал йоккха тоьпан гΙара тешаме накъост Кремолана хетар-м дац дуьххьара а.

Гайта комментареш

XS
SM
MD
LG