ТIекхочийла долу линкаш

Сом дайдаларх пайда баьлла еврозонехь бехачу вайнахана


Австри-- Венера нохчийн туька, 18ГIад2012

Австри-- Венера нохчийн туька, 18ГIад2012

Оьрсийчохь сом дайделла, суртсаташна мехаш тIекхетар бахьана долуш Европера нохчаша шайн цIера гергарчу нахана ахчанаш кхехьийтар алсам даьлла.

ТIаьхьарчу кIиранийн коьрта дийцарш Оьрсийчоьнна дуьхьал Малхбузено яьхна йолу санкцеш а, мехкадаьттан мехаш лахдалар а, ткъа и дерриге а бахьана долуш оьрсийн сом хазнесанна дайделла, цу махкахь сурсатийн мехаш лакхадовларца а, нахера къелла алсам яларца а доьзна ду.

Уггаре а хьалха и тайпа ахча дайдалар, сурсаташ даздалар, хууш ма-хиллара, таройоцучу нахах а, хьанал балхара даьккхинарг бен, кхин тIедогIуш рицкъ доцучу къинхьегамхой а, ткъа иштта гергарчара дечу гIоьнах боьзна а болуш, болх боцучу нахах а хьакхало.

И тайпанарш кIеззиг бац болхбацаран терахьаш Оьрсийчохь уггаре а лакхарчарех долчу Нохчийчохь. Дукхахьолехь я Iедало лучу пенсех я цIера арабевллачу гергарчара доуьйтучу гIоьнца хене бовлуш бу ДегIастанара могIарера бахархой. Ткъа хIинца, сом цкъа а ца хиллачу кепара дайдалар бахьана долуш, массо а хIуманна мах тIекхетар бахьана долуш вуно чолхе хьал хIуттуш ду цаьргахь. Иштта, кхеташ ма-хиллара, баккхий кхерамаш а бу нахалахь барьжина, кхин дIа хIун хир-те бохуш.

Цундела тамашийна а дац кху тIаьхьарчу кIиранашкахь Европехь бехачу вайн махкахоша шайн цIерачарна деш долу гIо алсам даккхар. Хьалха а, хIара тIаьхьарлера кризис хIоттале, Iадат хилла лаьтташ дара Малхбузехь бехачу вайнаха сих-сиха цIерачарна ахча дахьаийтар а, сурсаташ а, тIеюхург а царна латтор а.

ХIинца-м муххале а и гIодар шайн декхар санна тIеоьцу Европерчу дуккхахчу нохчаша. Венехь ехачу Астамирова Сацитас дийцарехь, шаьш а кхин башха даккхий диканаш хьоьгуш боцу Европера мухIажарш, хIетте а, хIуъу дина а цIерачарна накъосталла дан гIертар цхьа а цецвоккхуш хIума дац, мелхо а, хIора а аренца веха нохчо шайн цIахь бисинчу гергарна ша жоьпаллехь хеташ ву.

Астамирова Сацита: „Вайна ма-хаара, кхузахь Iачеран а кхин башха яккхий таронаш ма яций, эцца берана делларг а, тхаьш вовшахтоьхнарг а сом-эппаз цIерачарна дахьийта гIерта-кх. Царех болу сингаттам а, гIайгIа а кхузахь а дIайолуш ма яц. ЧIогIа сингаттамехь бу вайн цIераниш, массо а хIума язъелла а, сом дайделла, бохуш. Деман галих масех де хьалха 600 сом доьхуш хилла хIинца бIе туьма доьху боху, шекар дазделла, чай, массо а хIума, туьхане кхаччалца дазделла бохуш дуьйцу селхана телефонехула тхан цIерачара“.

Сацитас дийцаре динчух терра хьал ду Соьлжа -гIалахь ехаш ю йолчу 22 шо долчу Элизехь. Иза даханчу шарахь университет яьккхина яьлла, романо-германхойн факультет. Амма болх я ша Iамийначу говзаллийца а, я муьлхачу а кхечу меттехь а ца карабо цунна. Германехь вехаш волчу шен девешин доьзало гIо деш дацахь, йиш яцара шайн бохуш дуьйцу къоначу меттанийн говзанчас.

Элиза: „ Иттех шо ду тхан деваша шен доьзалца а цигахь Iаш волу. Туька ю церан, вайн къоман хIумнаш юхкуш, Европехь эца ца карош йолу. Цара гIо деш дацахь, тхан да амал дацара. Цигара цара кест-кеста тIейоха а, когайоха а хIумнаш тоссу тхуна, ахча а доуьйту. Вуьшта тхуна кхузахь карош болх а бац. Со йоккхаха ерг ю, вуьш болу йижарий, вежарий кегий бу хIинца а.

Тхан ненан а, сан а пенси ду, цунах хене довла дезаш дара-кх тхо, цара гIо деш дацахь. Ткъа иза муха дийр ду? Берашка ишколехь даима а ахчанаш доьху, цкъа 500 сом схьада олу, тIаккха кхин олу. Масех шо ду ас болх лоьху, амма иза карош бац. Цара цигара гIо деш ца хилча, тхо-м ларор дацара“.

ЦIерачарна гIодаран Iалашонна дуккха а тайпа-тайпана некъаш а, аьттонаш а карийнера Европерчу вайнахана. Масала, хьалха, вайнехан цIа бахар-бахкар иштта хIинца санна маьрша доцучу хенахь дукхахьолехь Вестерн юнионехула а, кхечу банкашкахула долчу некъашца а цара цIерачаьрна ахчанаш тоссуш хиллехь, тIаьхьарчу хенахь и болх шаьшна тIе эцнера Европера Нохчийчу некъахой, кир а дIасалелочу нохчийн шопарша.

ЦIадохьуйтучу ахчанна тIера шайна 5 процент елча, цара иза масех дийнахь цIакхачадора. ХIинца амма, олуш ма-хиллара, кхин цхьа ноу-хау юккъеяьлла муьлхачу а хьелашкахь а сом даккхаран говзалла цIийца йолчу вайнахалахь. Иза муьлхарниг ю дуьйцу Астамирова Сацитас.

Астамирова Сацита: „Кхузахь цхьа стаг ву, цуо шега кхузахь ахча дIаделча, оцу сохьта, Вестерн Юнионе ваха а ца оьшуш, цIерачаьрга дIакхачадойту иза шен цигарчу нахехула. 5 процент йоккху цуо. Делахь, хьалха -м лора иза хала а ца луш, амма хIинца евро дазделча, жимма и проценташ охьаяха а мегар ма дара аьлла хета.

Делахь, кхин дан хIума ца хиларна, и аьтто болуш а хазхеташ Iа тхо-м. Дуккхамо а дохьуйту иштта ахчанаш цIа, ас тессина иштта. Машенашца нах дIасалелочара а хьо ахча дIа, хIинца Iай уьш кхин башха сих-сиха ца лела“.

Еарий дийнахь Оьрсийчоьнан президента Путин Владимир шен йоккхачу пресс-конференцехь дичну къамеле ладоьгIча, кхеташ ду, Оьрсийчохь могIарерчу бахархойн Iер-дахар кесталгIа хIара аьлла толур ду бохучуьнга даха са доцийла.

Цундела шен-шен аьттонашка хьаьжжина, тIейогIучу халчу заманна кечамаш беш бу цу пачхьалкхан бахархой а, царна юккъехь иштта тIемаша а, тайпа-тайпанчу корруптхоша кочатуьйсучу, мацах нохчийн ширачу иллешкахь йийцинчарех тера йолчу „тIехь йоцучу ясакхаша“ а садукъдина болу Нохчийчоьнан бахархой а.

Цу хьелашкахь Европехь а, я мичхьа а кхечанхьа гIо-накъосталла дан гергара нах болчийн гIуллакх, схьахетарехь, мелла а гIолехь ду.

Гайта комментареш

XS
SM
MD
LG