Нохчий бохийначура 1957 шарахь цIабирзича уьш тIе муха эцна хууш ду бухахь церан латта а, хIусамаш а дIалаьцначу наха. Амма, Даймахкахь хилчхьана лаьттаха тоьла а яьккхина Iан а реза болуш цIа ихинчу нохчийн дукхачеран аьтто цабаьлла деша баха. Бераша, шай дайшна-наношна улле а хIиттина, цIенош деш, аренаш лелош белхаш бина. Дукхачу доьзалшкахь, берашна юккъера цхьаъ къаста а вой, цуьнга дешийта гIиртина нохчий.
1958 шарахь цIабирзина шолагIчу шарахь Соьлж-ГIалахь лаккхарчу доьшийле вахар совнах, иза цул тIаьхьа дикачу кхиамашца чекхяьккха а, доккха майралла а, доьналла а хилла а ца Iаш, онда яхь хила езаш хилла. Ишттачарех бу оцу шарахь Соьлж-ГIаларчу мехкдаьттан институте деша а хIиттина, иза чекхяьккхина, шай нахана а, къоманна а, пачхьалкхана а пайдехь хилла болу нах.
Тахана уьш къаной бу, амма хIета замано ша дахчийна болат санна, къера а боцуш, букъ а ца сетташ, яIне нийса а латтош, кегийчу нахана масале а хIитто мегар долуш нах бу уьш.
Кху деношкахь церан вовшахкхетар хиллера Соьлж-ГIалахь. 58 шо дIадаьлла уьш деша хиттина. Оццул дукха хан яьллехь а, шортта дагалецамаш бу церан шай дIаяханчу жималлех а, дешарх а, дахарх а.