ТIекхочийла долу линкаш

ЦIеххьана кхаьчна хаам!

Шема кхача лаам белахь а - кхел


Шемарчу тIемалойх дIакхета лаам берш а набахте хьийсабо Нохчийчохь

Дуьненаюкъарчу пачхьалкхашкара бахархой а цхьана Шемарчу тIамехь дакъа лоцуш хилар къайле яц цхьанна а гергахь.

Амма царлахь къаьсттина дукха бу Советан пачхьалкхан хиллачу мехкашкара нах, доккхачу декъанна Оьрсийчуьра бахархой.

Гергарчу Малхбалерчу тIемашка кхача лаам болучарна дуьхьал бехктакхаме гIуллакхаш ду ийдеш махкарчу Iедало.

"Дозанал ара а буьйлуш, жихIадхойх бетталу нах интернетчохь мониторинг ечу хенахь гучубуьйлу".

Масала, Нохчийчохь зуламаш дан кечам барна а, Шемарчу тIеман конфликтехь дакъалаца лаам хиларна а аьлла оршотдийнахь Соьлж-ГIаларчу вахархочунна Эльсанукаев Ахьмадна 3 шо хан кхайкхийна.

Талламчийн версица, Эльсанукаев Туркойчу вахана хилла, цигара дIа Шема дехьа а ваьлла, «Исламан пачхьалкх» шех олучу тобанах дIакхета Iалашонца.

Туркойн-Шемин доза хадочу заманчохь лаьцна, Оьрсийчу кхачийна Эльсанукаев Ахьмад.

Гуш ма-хиллара, зулам дарна ца тоьхна Iедало цунна хан, Шемарчу оппозицех дIакхета гIортарна йина ю кхел.

Иштта, шинарийдийнахь Нохчийчуьрчу Октябрск кIоштарчу яхархочунна Чатаева Хедина а тоьхна кхо шо хан.

Шемарчу ДаIишах дIакхета Iалашо а кхобуш, харцонца кехаташ кечдина аьлла, ши гIуллакх дуьхьал айдира Чатаева Хедина дуьхьал.

Стохка гуьйренан баттахь Нальчикехь лецира иза.

Билгалдоккху, Шема дIа а ца кхаьчначу йоIана 208-чу артиклца тIе теттина бехк низамашка диллича, харцо ю.

Ала догIу, Iедало ойла тилкхаза а юьйлуш, Шема дог-ойла лаьттачу кегийчу нахаца мелхо а уьш нийсачу новкъа бохуш, кхеторан болх дIа ца хьош, 3 шарера 6 шаре кхаччалц хенаш а етташ, набахте хьийсош хилар.

​Нагахь санна, Iедало и нах Шемахь хилла аьлла чIагIо яхь, бахархошна етта хенаш кхин а лакхара хуьлийла ду.

Прокуратуран хаамшца, дозанал ара а буьйлуш, жихIадхойх бетталу нах интернетчохь мониторинг ечу хенахь гучубуьйлу.

XS
SM
MD
LG