Степная урамерчу 35-чу цIа чохь тIемалой бу аьлла хаам кхаьчначу низамхоша оцу меттигна го а бина, лерина операци дIаяхьна. Оцу цIа чохь нисвелла ОздоевгIеран ши ваша - Адам а, Хьасан а. Цушиммо тIе ца дитина, боху, гобинчара къера а хилий, куьйгаш а айдай, аравала бохург.
Низамхоша деза герзаш детта долийна оцу цIенна тIе. Иза дагадоьлча, цуьнан кIуьра юкъара вала гIоьртина ши тIемало. Шайна дуьхьал нисвелла эскархо а вийна цара герз диттина. Иза ву Амирханов Джамболат. Вадарх гIуллакх ца хилла ши ваша-тIемало догучу цIа чохь велла.
Хилларг дирзина далале, оцу цIенна луларчу кхечу цIа чохь а тусавелла Iедалхошна тIемало. Иза хилла боху Несарарчу тIемалойн баьчча Местоев ИбрахIим. Оцу шолгIачу цIийнан дас Манкиев Якъуба буьйса яьккха чувитина хиллачух тера ду Местоев. Цигахь вийна и тIемало а, хIусаман долахо Манкиев Якъуб а.
Ала догIу, Якъуб гIалгIайн оппозицин декъашгхо волчу Манкиев Баматгирин кIант ву. Дас а, кхечара а дехар дича, хьаша а витина, аравер вац ша, аьлла, жоп делла цо.
Маршо Радиога цунах лаьцна дийцира «Машр» цIе йолчу бакъонашларъяран цхьанатохараллан куьйгалхочо Муцольгов Мохьмада.
Муцольгов: « Селхана виъ стаг вийна ГIалгIаймахкахь. Суна хууш, ши ваша ву ОздоевгIеран вийна. Адаммий, Хьасанний. И шиъ цхьана цIа чохь вийна. ШозлогIчу цIа чохь Манкиев Якъуб - министр а, депутат а, республикан президентан дарже кандидатан а волчу Манкиев Баматгирин воI ву.
Цо ша аравер вац аьлла, ша волчу веана хьаша ара ца валахь. Хьешехь, Местоевгахь, герз хилла. Манкиев Якъуб волчохь цхьаъ, я шиъ буьйса яьккхина ала ца хаьа суна, амма Баматгирис а, ФСБ-н куьйгалхочо а къамел дича а, Якъуб, ахь дина хIумма а дац, ахь хьо волчу стаг чувитар доккха зулам а дац, аьлча а, реза ца хилла иза. И шиъ ву оцу цIа чохь вийнарг».
Бакъонашларъярхочо Муцольгов Мохьмада бахарехь, вийна волу Манкиев Якъуб шен дас вайнехан гIиллакхашца кхиийна вара. Ша а дахарехь дика кхиамаш болуш, экономист хилла и жима стаг.
Муцольгов: «Экономикан Iилманийн кандидат а волуш, кхаа беран да вара иза. Шен хьаша ара ца валахь, ша аравер вац аьлла цо. Герз а ца хилла цуьнгахь, хIумма а ца хилла. Вукхуьнгахь хилла. Дакъа хIинца а схьаделла дац».
Байина тIемалой, официалера болчу хаамашца, бехке бу стохка Чермен-эвлан йистехь, ГIалгIайчоьнца дозанехь йолчу блок-постехь Iожалхочо машен а оьккхуьйтуш динчу зулама. ХIетахь хIирийн цхьа полисхо веллера.