«Исламан пачхьалкх» шех олучу тобано шена тIелаьцна Францин коьртачу гIалахь Парижехь тIелатар дар, хаам бина Le Figaro газето, цу тобанан интернетан ресурсана тIе а тевжаш.
Хьалхо Францин президенто Олланд Франсуас дIахьедар динера Парижехь хилларг хьалххе кечйина теракт ю аьлла, хаам бо Reuters агенталло.
Еарин сарахь Парижан юккъерчу Шамп Элизей авенюхь зуламхоша герз тоьхнера полицин машенна. И бахьана долуш полицин цхьа белхахо вийна, шиъ чевнаш хилла ву.
Сихонца орцах яьллачу полицин тобано вийна тIелатар динчерах цхьаъ. ШолгIаниг ведда къайлаваьлла. Иза лоьхуш ю полици.