ТIекхочийла долу линкаш

Ша-шена кхайкхийна санкцеш


Оьрсийчоь -- Петарбухехь туьканахь махкара йоцу нехча дIанисйеш ву белхало. Марс.11, 2014

Оьрсийчоь -- Петарбухехь туьканахь махкара йоцу нехча дIанисйеш ву белхало. Марс.11, 2014

Оьрсийчоьно Малхбузенна дуьхьал яьхначу сурсатийн санкцех хила там болу зенаш цу пачхьалкхана шена алсамох хир ду аьлла хета Евробертан куьйгалхошна.

„Малхбузено Оьрсийчоьнна дуьхьал яьхна йолу санкцеш доккхахчу декъехь Кремлана гергарчу концернашний, совдегаршний гIуданаш дар Iалашо йолуш ю. Ткъа Кремло Малхбузенна дуьхьал яьхнарш массарна а гIуда дар Iалашо йолуш ю“ - иштта го Европерчу тергамхошна а, коьртачу хаамийн гIирсашна а Оьрсийчоьнан президентан Путин Владимиран сацамца юккъеяьккхина йолу Малхбузерчу юьртбахаманан сурсаташна йолу эмбарго. И эмбарго уггаре а хьалха могIарерчу Оьрсийчуьрчу бахархошна зенехь хилар Кремло, гарехь, мехала ца лору. Цкъа а шен политикан я идеологин Iалашонашкахь мискачу нехан хьашташ тидаме ша оьцуш ма ца хиллара.

Шеко йоцуш, санкцеша цхьанна агIонна а пайдехьа яц. Цундела а яра Европа, Украинехь Оьрсийчоьнан агресси йолаелча дуьйна схьа, и гIуданийн некъ юхьара ца лаца гIерташ, юхаийзалуш.

Экономикан агIор Оьрсийчоьнах иштта Европа санна совйозуш йоцучу Цхьаьнатоьхначу Штаташа ша мел ира-кира хIиттаярх, еххачу ханна экономикан санкцешка ца йолуш лаьттира иза, Кремлан леламаш хийцабаларе сатуьйсуш.

Эххар а маьрша некъахой чохь болу кема, хетарехь, Кремлан агIончаша Украинехь чудаийтинчул тIаьхьа, ткъа тIаккха а Оьрсийчоьно шен сепаратисташна белшашгIорторан политика хийца ца хийцича, мелла а шогох йолу гIулчаш ца яьхча ца ялар тIедуьйжира Евробертана.

Оьрсийчоьнан президенто тIеэцна болу сацамаш цу Евробертан санкцешна дуьхьал еш хIуьттаре лара мегар ду. Бекхам-м цунах олийла а дац, ткъа нагахь санна иза бекхам белахь а, шаьшна оьрсийн бахархошна дуьхьал бекхам бу иза. ХIунда аьлча, церан такха дезар ду Кремлан амбицех болу беза мах. Уггуре а хьалха оцу Путинан омрица эмбарго кхайкхинчу сурсатийн мехаш лакхабевр бу, ткъа уьш ца эцча ца волуш долу кхачанийн сурсаташ ду.

Оьрсийчоьне шен ницкъашца шен бахархойн хьашташна оьшшучул и тайпа сурсаташ Iалашдалуш ца хиларна, церан импорт ца йича, уьш ца тоьуш хир ду, мацах советийн заманара массарна а дика девзаш долу „дефицит“ боху дош халкъалахь юха а жигара лела а долалуш. Ткъа цу тIе кхачале хьалхара гIулч - мехаш лакхвдовлар, - хIинцале а Оьрсийочьнан а, Нохчийчоьнан а базаршкахь а, туьканашкахь а хаалуш ю.

Маршо радионца къамел дичну Соьлжа-гIалин яхархочуо Ташаева Заргана иштта дуьйцу цу гIаларчу базарахь мехаш хийцадаларх лаьцна.

Ташаева Зарган: “Арахьарчу махка чу дахьаш долчу шуьрин сурсаташна мехаш тIекхетта. Жижигна а тIекхетта мах, кхетташехь цIеххьана масех туьмана а кхеташ. Юург хIинцале а язъелла, амма иштта тIеюху хIумнаш а язлуш ю. Кху махкахь еш-тоьгуш ма яц уьш, арахьара чу яхьаш ю.

Некъ базбелла, билеташ дазделла, евро дазделла, тIаккха цундела тIеюху хIумнаш а язлуш ю. Iе а, ваха а хала ду, де дийне мел долу аттачу долуш-м тешна а дацара хIара, холчу долуш ду-кх“.

Цу юкъана Кремлана гергара аналисташ телевизионехула юкъараллийна тоьшаллаш деш бу, мехийн катастрофа хир яц, Оьрсийчоьне шен ницкъашца ша кхабалур ю, мацах Советийн заманахь а ма кхабалора вайга ваьш, бохуш.

Бакъду, тамаша бу и тайпа Советийн заманца долу дустар Оьрсийчохь дуккханна томе хилахь. ХIунда аьлча, тIаьхьарчу шерашкахь дуьненах бIаьрг тоха а, маьрша ваха а, ван а, кхечу пачхьалкхашкахь садоIа а, цигарчу томех а, диканех а марзо эца а Iеминчу таханлерчу оьрсашна луур дац, кхин цкъа а эчиган пардонна тIехьа дIакъевлина баха.

Луур дац царна иштта, къайлах а, къулах а джинсан хеча эца кадалахьара бохучуьнга юха а сатийса а, я хIетахь санна туьканашкахь йоьхьийн дефицит хилийта а.

XS
SM
MD
LG