Махко терроризмах ларлуш бен талламаш тIех сов нахала бевлла, бохура еарийн дийнахь шайн кхерамзалла чIагIъяран программа хьахош Iамеркан Цхьаьнатоьхначу Штатийн пачхьалкхан секретара Керри Джона. Европехь а, кхечашхьа а Iамеркан низамхоша телефонашка ладоьгIна, аьлла, яьллачу скандалан хьокъехь цо элира, и болх дуьненаюкъара терроризм эшорхьама бан оьшу. «Вай цхьа нах шаьш шайн лелхийта кийчча болчу керлачу дуьненахь деха», - аьлла, тIе а тухуш.
Амма, нагахь санна Iамеркан кхерамзаллин урхалла и тайпа зераш деш, низамо магочул а совъяьллехь, иза а къастор ду шаьш, бохура Керрис. Iамеркара веддачу программиста Сноуден Эдварда Iамерко дуккха а мехкашкара телефонашка ладоьгIу, аьлла, даржийначу къамелан тIаьхье ю, цо цIерш яьхначу пачхьалкхаша Iамеркана дегабаам бар.