Нохчийчохь даздеш ду къоман цхьаалийн де. Иза коьртачарех де лоруш ду махкаь долчу таханлерачу Iедалша. Оцу денна хьажийна Соьлж-ГIалана юкъахь митинг дIаяьхьира, маьрша а, машаре а Нохчийчоь хестош, цунна хьалха ваьлларг а вазвеш.
Цхьацца Iедалан хьукматашкахь а, урхаллашкахь а цу гIуллакхана аьлла цхьаанакхетарш а, дийцарш а, концерташ а хилира. Шуьйра дийцира цигахь а, Нохчийчоьно муха меттиг дIалоцу Оьрсийчоьнан пачхьалкхан барамехь.
Нохчийчоьнан бертан а, цхьааллин а де аьлла дIакхайхкина дара 2002 шарахь, хIетахь республикан коьртехь хиллачу Кадыров Ахьмада. И де хьаржар а шен бахьана дара. ХIетталц Гезгмашин-беттан 6-гIа де Ичкерин пачхьалкх кхолларан де санна лоруш дара. Цундела и де, дIа а ца тоттуш, дитар бахьана дара оцу агIор а, вукху агIор а нохчий цхьана ойлане балабан.
Iедалша и де мухха а тидахь а, юкъараллехь нохчашна юкъахь барт а, цхьаалла боху хIума генахь ду аьлла хета цхьаболчу нахана. Соьлж-ГIаларчу вахархочо Хамзатов Ильяса бахарехь, нохчий цхьана ойланехь хуьлу бохаман, я йоккхачу харцонна хьалха. Иштта хилира, цунна хетарехь, ши де хьалха Соьлж-ГIалахь дIаяхьанчу митингехь элира цо.
Хамзатов: «Нохчийн къоман барт хилла 2002 шарахь дуьйна цхьа де деара ши де хьалха. Мьянмехь болчу рохIинджашна гIо дан деза аьлла митинге гулбалар тIехь барт хилира. Кхин барт хилла суна-м ца хааlелла».
Даима барт хилийта нохчашна юкъахь хIун дан деза а элира Хамзатов Ильяса. Нийсо цунна бухе йиллина хила еза аьлла хета цунна.
Хамзатов: «Соьга хаьттича нахана юкъахь барт хилийта наха хIара цигара вуй, важа цигара вуй бохуш, бекъа а ца боькъуш, нийсонца лара беза массо а. Иза хета-кх суна».
Гезмашин-беттан 6-гIа де дукхачу нехан дагалецамашкахь нохчаша шайн пачхьалкх кхоьллина де санна лорурш а кIезиг бац кхузахь. Нехан дегнашкахь ду иза, аьлла дийцира Теркйистан кIоштара вахархочо Абуев Зиявдис.
Абуев: «ХIа хIуъа а дийцича а вайн къоман маршонан де ду хIара. ЖовхIар вайн дуьххьарлера президент а ву.
И де дицдайта гIерташ нах а бу. Шайна ма луъу хIума лелор ду цара, амма нехан дегнашкахь лаьтташ ду и де. Хан-зама хийцало. Тахана цхьангехь ду иза, кхана - кхечуьнгахь».
Нохчашна юкъахь барт а, цхьаалла а баккъалла а, моттаргIанехь а доцуш, хилийта дукха хIума ца оьшу аьлла хета нахана. Нийсо ю оьшург. Иза цхьаболчу нахана ю аьлла ца хета таханлерчу Нохчийчохь.
