ТIекхочийла долу линкаш

ЦIеххьана кхаьчна хаам!

Гадаев Мохьмад-Салахь. Iуьйре йогIу, суьйре йоьду...


please wait

No media source currently available

0:00 0:02:02 0:00
Линкана тIе



Гадаев Мохьмад-Салахь

* * *

Iуьйре йогIу, суьйре йоьду,
суьйре йогIу, Iуьйре йоьду,
де дIадоьдий, буьйса йогIу,
буьйса йодий, де ма догIу.

Шар чохь лелаш шийтта бутт бу,
диъ куц хуьйцуш хийцамаш беш,
бIаьсте йогIу, аьхке йогIу,
гуьйре йогIу, Iа ма догIу.

Муьлха хан ю даго къастош,
цу хенашкахь хьуна йогIуш,
цу хенашлахь даго къастош
суна йогIург бIаьсте ма ю.

Герга кхаьчна бIаьсте йогIу,
суьйре, Iуьйре хазлуш йогIу,
олхазарш ду декаш, ловзуш,
цу бIаьстенах даккхийдерца.

Массо Iалам даккхийдеш ду,
дуьне дохдеш, бIаьсте йогIуш,
дуьне ма ду духар хуьйцуш,
дуьнене со гIийла хьоьжу.

Массо Iалам хаздеш, кхолуш,
массо Iалам дохдеш, дендеш,
Iалам хьоьстуш, синош дендеш,
схьа ма кхечи бIаьсте вайна.

Iуьйренца со араваьлча,
олхазарийн эшарш хеза,
цкъацкъа гергахь, цкъацкъа генахь,
гIийла екаш оттйокх хеза.

Денна хазлуш дуьне ма ду,
денна жимлуш кийрахь дог ду,
денна гIеллуш дегIехь ницкъ бу,
дегI цамгаро дIа ма леци.

Цамгаро со эшош лаьтта,
уьйрашна со вицлуш лаьтта,
со уьйрашна жерга вели*,
цамгарца со гIийла виси.

Сан гIийла дог даим хьоьжу,
сайн нийсарой сайна богIий,
уьш ца кхуьу, дуьне лоьхуш,
суна бахка кхане етта.

Цхьа а ма вац лийра воцуш,
цхьа а ма вац дуьне кIордош,
ма довла вай вовшех, кIентий,
ма вита аш со дIатасий.

______

*жерга вала - лаамаза хервала

Мохьмад-Салахь Гадаев вина ГIуран-беттан 6-чу дийнахь, 1909-чу шарахь. 1928-чу шарахь иза Ростовехь рабфаке деша дIехIутту. 1930 шерашкахь иза Нохчийчохь историн а, меттан а, литературин а Iилман-талламан институтехь болхбан волало иза. Лермонтовн а, Толстойн а, Пушкинан а, Некрасовн а, Шевченкон а дийцарш нохчийн матта гочдо. Цу хенахь цуьнан ши киншка арайолу “Ши стаг”, “Буьйсанан дошло”, “Нус”, “Гуьржи”, “Акхалла”, “Хазман”, “Накъостий”, кхиерш а.

1942-чу шарахь иза антисоветан агитаци лелорна а, национал-троцкистийн тобанан декъашхо хиларна а бехке а вой, пхийтта шарана набахти чувуллу. 1957-чу шарахь иза набахти чуьра араволу. 1957-чу шарахь иза Iедало юха а лоцу, нохчийн къам сийсаздина, яздорхо вийна, аьлла, бехке а во. Амма тоьпаш тоха дина таIзар хуьйцу, цуьнан метта 25 шо набахти чохь даккха хан туху цунна.

1972-чу шарахь набахти чуьра ара а волий, Даймахка юхавогIу иза. Араваьлча, псевдонимах пайда а оьцуш, цо дийцарийн гуламаш язбо. 1972-чу шеран ГIуран-баттахь Мохьмад-Салахь кхелха.

XS
SM
MD
LG