Марсхьокху-баттахь «Бакъонан инициатива» фондо зорбанехь зударий сунтбеш Дагестанехь практика хилар дуьйцуш, Iораьяьккхина рапорт бахьанехь дуккхаъчу гонашкахь дижа ца дуьтуш кеп-кепара дийцарш, хетарш ду тахана а.
Санитаран хьелаш ца лардеш, адамийн бакъонаш а хьоьшуш кхуьучу зудаберашна тIехь къизалла лелоро Iадийна дуьненан бакъоларъярхой.
Чевнна тIе туьха тосуш санна хетало, Къилбседа-Кавказерчу бусулбачийн координацин юкъараллан куьйгалхочо Бердиев ИсмаьIала «Интерфакс» агенталле оцу ламастах шена хетарг алар.
Иштта боху Бердиевс: «ЛаьттатIехь шайн догIмийн лаамашна тIаьхьа а бевлла, кеп-кепара маьттазалла ца лелаяйтархьама массо а зуда яра сунтъян езаш.
Бераш дуьненчу даха а, уьш кхио а кхоьллина ю зуда, ткъа сунтъяро ца йо новкъарло шен декхарш цунна кхочушдарехь.
Ца хуьлу зудчун могашаллина цхьана а кепара зен. Амма зуда Iехош болу лаамаш цаьргахь кIезиг хилча, кху дуьненчохь маьттазалла хир яцара», боху Бердиев ИсмаьIала.
Ткъа зударийн агIончаша, шайн рапортехь, и тайпа операцеш наггахь бен ца йо боху медицинан хьелашкахь, санитаран нормано ма хьоьхху. Дуккха а масалш ду боху цара, йина операци ца йоьрзуш, чевнаша сагатдеш, зударша бала хьегна.
Iеламчас харц ца до Дагестанехь цхьайолчу ламанан кIотаршкахь зударий сунтбеш ламаст тахана а схьадохьуш хилар.
Оцу юкъанна, Къуран дика девзачу Бердиев ИсмаьIала даредо, Исламо зударий сунтбар тIедиллина фарз дац, амма дуьххьал дIа дагестанхойн ламаст ду и бохуш.
Бакъонашларъярхоша бинчу талламашца, зударий сунтбар эвсара ду къаьсттина лаьмнийн Цумадинан, Ботлихан, Цунтинан, Бежтинан а кIошташкахь.
Цара баилгалдаккхарехь, оцу операцех чекхдоху дай-наноша шайн зудабераш 3 шо дуьзначул тIаьхьа. Наггахь нисло I2 шо кхаьчначул тIаьхьа йоI сунтъяр.
Кху деношкахь цхьа могIа дуьненаюкъарчу бакъоларъярхоша зорбанехь яздо, оцу къизачу ламасто зударийн ян а йоцу бакъонаш хьоьшуш хилар. Иза дискриминаци а, адамна тIехь ницкъбар а лору цара.
Къилбаседа кавказерчу бусулбачийн координацин куьйгалхочо Бердиев ИсмаьIала, рогIерчу къамелехь керсто хьалхо ша аьллачу дешнашна. «Сох нийса ца кхетта, я кхета ца лиина. Хьалха айса аьллачунна тIехь ву со, амма ас ца кхайкхийна Оьрсийчоьнан массо а зуда сунтъян», боху цо.
Нохчийчьурчу бахархойн дог-ойла йовза лиира Маршо Радиона. Бердиев ИсмаьIала хьоьхург кхочушден ламаст карладаьккхича буй-те хила пайда, аьлла хаьттира оха Ноьвр-кIоштарчу вахархочуьнга Израилов Абуга.
Иштта бу цуьнан хьажам.
Израилов: «Суна лартIахь ца хета и хIума я суна бевзачарна а. Оцу Бердиевс дина дIахьедар дешна ас интернетехь. Масала, тахана со зуда яло везаш ву, цхьана йоIана чIогIа тIаьхьаваьлла со, иза езаелла, сан амалца йогIуш а ю иза, церан нахана а реза а ву со, сан нахана церан нах а.
Амма оцу йоьIан цхьана а кепара соьца марзо яц. Шена хьо ца оьшу боху цо, хьо ца хилча а со суо а яхалур ю. Суна сайн тIаьхье хийлийта а лаьа, ткъа оцу йоьIан соьца цхьа а кепара шовкъ яц. И муха хуьлу тIаккха?