Your browser doesn’t support HTML5
МухIажиршна хIун гIо дина ахь?
Бут сов хан ю ахча гулдан долийна. Шозза Фейсбукехула, Ютубехула, кхечу социалан машанашкахула гулделлачу ахчан барам а, и сагIа кхача дезачаьрга дIакхаьчна хилар а хаийтина Садулаевс.
Маршо Радиога а дийцира цо ханна болхбечу Берестерчу мухIажиршна леринчу фондах дерг.
Садулаев: «Европехь, дозанал арахьа 300 000 ву боху нохчо. Цуьнга хьажча, кIезиг ду кхаьчна гIо. Делахь а, динчу гIоьнах а воккхаве торуш хьал ду. Цецвоккхуш ду мискачу наха мискачарна накъосталла деш гар – Нохчийчуьрчу а, Шемарчу а нохчаша а дахкийтина ахчанаш. Нохчий боцучара а дахкийтина. Иза оха дIа а делла уггар доьхначу хьолехь тхайна карийначу Брестерчу нахе. Амма дика хир дара болам шуьйрра баьржича».
МухIажиралле бирзина, Европе кхаьча хьаьгна, я цIахь а, я цигахь а боцуш, Брестаний, Полшин дозанний юккъехь балахьоьгучу эзарнех доглозурш дуккха бу. Ткъа бац и тайпа нах Iедалхошлахь. Цундела могIархойн, юкъархойн, деккъа дIа шайггара царна дан накъосталла лоьхучу нехан карахь дисина гIо лехар а.
Иштачех ву Францино политикан тхов-кIело а елла, Страсбургехь веха жигархо Ахъядов Iиса а. Иза виллина а хьийза гIелонехь бохкучу мухIажиршна а, даймахкара шайн могашаллина сагатдеш, Европе кхочучу махкахошна а гIодеш.
Iиса кху муьрехь шега далуччул накъосталла деш хьийза Европе бахка арабевллачу нахана. Стенна ца болу аьтто церан Полшин дозанал чоьхьабовла, стенца ю церан юкъара ледарло, хIун дан деза Брестехь лаьттачу оцу наха? Оцу хеттаршна жоьпаш Ахъядов Iисас иштта делира Маршо Радиона.
Ахъядов: «Массех бахьана ду Европан ков мухIажиршна схьаделла: дин лело нах ца буьтуш хилар, къоманна социалан бохам тIебожар, адамаллин бакъонаш хьешар, политикаца гIелояр, цамгар къоманна тIетаттаялар. Кхидерг чекх ца долу, тхов-кIело иштта дIа, со меца ву аларх луш яц. Брестера адамаш цхьана могIане хIитта беза, ша-ша чекхвала а ца гIерташ. Политикан бахьанаш хьалхадаха деза массара а цхьаьна. Ткъа вайн адамаш цунах ца кхета. Оцу наха Кадыров дашо а ву, тхуна Европера тоьлла дахар а деза бахарх гIуллакх хир дац».
Цкъачунна дерриг а могIархоша дуьйццучохь лаьтта. Цкъа церан бац я цхьа а ницкъ а, я дуьззина, маьIна а долуш, дан хIума а Брестехь балахьоьгучарна.
Къомах жоп лучара дуьйцург а, царна хетарг а – иза а ду кху муьрехь даьржжина хезаш. Кадыров Рамзана и нах бац мухIажирш, царех къахета оьцуш а дац боху. Я дуьне а, я эхарт а доцуш буьсучу нохчийн некъ муха боьрзур бу, цаьрга цара хIун дан деза я олуш а, я церан дог а хьаьстина, уьш цIабоьхуш а дац Нохчийчуьра Iедал.
...Ткъа арахь-м дуьйладелла нохчочунна шен дахарехь цкъа дIадолуш а доцу догIа, гуьйренан ткъарш, цунна даима а лаьттина, лаьтташ йолу шийла шело.