ТIекхочийла долу линкаш

ЦIеххьана кхаьчна хаам!

Жима ши бер а эцна, Шема яхана нохчо


Шемара тIом

33 шо долчу нохчийн зудчунна дуьхьал бехк-такхаман гIуллакх гIаттийна деношкахь ХIолландин полицино. Иза бехкейо шен ши бер, дега а ца хоттуш, лачкъийна шеца цхьаьна Шемарчу тIемаш лаьттачу Ракка гIала дIадигарна.

ХIоландерчу Iедалан а, берийн ден а ницкъ ца тоьъна оцу зудчо дан леринчунна дуьхьало ян.

Полицина хетарехь, шина бераца харц кехаташца масийтта Европан пачхьалкхах яьлла жима зуда.

Берийн хенаш 8 шо йоьIан а, 7 шо кIентан а ду.

Маастрихт гIалахь ехаш хилла и зуда шен шина бераца.

ТIаьххьара и доьзал гина дахначу шеран ГIадужу-баттахь.

Карарчу хенахь шен шина бераца еха и «Исламан пачхьалкх» шайх олучу тIеман тобанийн ханна шахьара ларалучу Ракка гIалахь.

Низаман урхаллашна хетарехь, цу зудчана гIо хилла джихIадхой Шема а, Иракъе а дехьабохуш къайлаха лелачу тобанера, хIунда аьлча, и зуда лаца Iедало арахецна омра доллушехь цуьнан кадаьлла пачхьалкхан дозанал дехьа яла.

ТIаьххьарчу шина шарахь ХIолландин Iедална хааделла махкахь бехачу бусалбанех иттаннаш Шемарчу тIеман тобанех дIакхетархьама, шайн доьзалаш дIатуьйсуш я шайца буьгуш, Шема дIаоьхуш.

Амма дегара бакъо а йоцуш, бераш а эцна дIаяхана и цхьаъ бен яц зударшлахь, билгалдоккху Хiолландин зорбано.

Маршо Радион къамел хилира Австрехь вехачу Аьрсбин Абубакарца. Иза кIоргга дин а девзаш бусулба стаг ву. Цунна инзаре хета нохчийн жима зуда шен лааме яьлла, уллехь цIинйдаа воцуш, иштта маьрша лелар.

Абубакар: «Шен ойла а йина, шех дуста деза стага цхьа х1ума т1е1оттаделча.Т1е ма дайла иза шен чу я нехан чу и саннарг т1едарах.Хаьттина х1ума а доцуш, мича йоьда а доцуш, юххехь стаг воцуш нехан ц1ент1ехь йолу зуда д1аяхар. Хьерадаьлла х1ума ду-кх и соьга хаьттича".

ХIолландин юстицин министралло тергоне эцна ву 180 джихадан ойланаш шайца лелаш, Шема дIавахана бусулба стаг. Царех 35 юхавеана, вийна тIамехь 21.

ХIинца ХIолландин Iедало талламаш жигара баьхна и жима зуда яьхначу Маастрихтехь. Иза къастош ду, мила ву джихадан ойланаш кегийрхойшлахь кхиошверг, уьш Шема кхачош а, дозанал арабохуш гIо деш а.

ХIолландин низамхоша бахарехь, нагахь санна и зуда Шемахь елахь, ницкъ бац цунна доггIу таIзар дан – Шемица цхьа а юкъаметтигаш яц ХIолландин.

Охан-батттахь Оьрсийчуьра зудий-майрий Дынько Павел а, Гюзель а шайн карарчу бераца цхьаьна лаьцнера Шема тIаме даха новкъадаьлла. Дов листинчул тIаьхьа царна Iедало набахтехь яккха цхьа шой, 5 буттий хан туьйхира.

Дукха хьолахь Шемара юхабахказа буьсу цига баханарш. Цхьаццаберш шаьш арабевллаче юха а кхочу. Олийла дац цара юьхьарлоьцу некъаш церан шайн проблема ю.

Уьш бахьанехь Европехь меттигерчу Iедалша цатешамца луьтту бухахь беха эщарнаш нохчийн. Дериг къам дIатардо дуьненца гамделлачу адамийн декъах-джихIадхойх цхьаццаболчу хаамийн гIирсаша а.

Хьажа комменташка (2)

ХIара форум дIакъевлина ю.

Комментари

New Comments Available

"Венера Анзор" цIарца вевза Умаров Мамихан вийна Австрехь. Бахьанаш хIун хета шуна?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

Оха хьоьхург

XS
SM
MD
LG