ТIекхочийла долу линкаш

ЦIеххьана кхаьчна хаам!

Наркотикаш юхкуш салтий лецна Соьлж-гIалахь


Къилбаседа Кавказна, ерриг а Оьрсийчохь а санна, гIайгIа бохьуш бу наркотикашца боьзна бала. ХIинццалц кортабахош долу и ун хьахош могIарчу бахархойн цIерш йохура Iора. Ткъа дуьххьара ду кху шерашкахь наркотикаш лелош а, юхкуш а болу эскархой Нохчийчохь карор Iорадаккхар.

Чоьхьарчу гIуллакхийн министаралло денна Iорабохучу хаамашца наггахь доцург де ца догIу наркотикаш йохкарна а, эцарна а, дIаIалашьярна а махкахь куьг бехкенаш леца ца лоьцуш.Бакъду,атта нислуш хIума дац юкъараллехь гIара а долуш-м муххале а, кIомалх пайдаэцна эскархой лецар.

Низамо магош доцчу кепара наркотикаш лелорца къийсам баллочу урхалло дIасадаржорца, церан а,къайлахчу сервисан а белхоша цхьаьна дIаехьначу операцехь лаьцна «Северный» олучу тIеман гарнизонера кхо эскархо. Дийцарехь цара цигга шайн тIеман декъехь, хьалххехь кечбинчу шайн бустам-барамашкахь юхкуш хилла и зуламе коьчал.

«Наркополисхоша а, федералан кхерамазаллин сервисан белхоша а, хьашто йолу кеп а хIоттийна, шаьш тешам белла стаг тIе а хьажийна, цкъа хьалха шаьш эцна, цунах бизнес йинчу салтичуьнгара 11 гарам сов марихуана. Цу меттехь схьалаьцна йохкархо», - боху наркоурхаллин хьостано.

ТIаьхьо цигга тIеман гарнизонехь дIадехьна зераш бахьнехь, бензин-солярка дуттийлехь гучуяьлла хьуламехь дIайиллина латтош йолу кхин а 38 гарам марихуана. И меттиг нисьеллачул тIаьхьа, бехктокхаман гIуллакх а долийна, шуьйра талламаш дIабаьхьначу говзанчаша бечу чIагIамашца «Северный» тIеман декъехь бен-бен наркотикаш йохкаран некъ чIогIа караберзийна хилла эскархоша.

Цара уьш схьайохьуш хилла ХIирийн мехкан Мазалк гIалара схьаоьхучу тIеман машенийн ковранех пайда а оьцуш. Талламхоша кхобучу шеконашца церан кхин а масех гIоьнча-накъостий хила а сахьт дац. Уьш царна латтош наркогеланча мила хилла? Мичара схьайохьуш хилла? Эпсарша дакъа-м ца лаьцна те цу зуламехь? Цу могIарерчу хеттаршна жоьпаш лохуш бу низамхой.

Лакхахь хьахаелла «Северный» цIе йолчу гарнизон санна Соьлжа-ГIалахь цхьана тIеман декъехь гIуллакх деш волчу, ас цIе ца йоккхуш вуьтучу нохчийн эпсаро зIенехула диначу къамелехь гучу ма даллара кIомалх са еш лаьцнарг виъ эскархо хуьлчух тера а ду: цхьа гIумкхи, цхьа эрмало, ши оьрсий. Шена хуучух зIенехула дуьйцуш ву и эпсар ша.

Билггала хIуъчара дийцарехь кеп-кепарчу наркотикех беттабаларал сов вайнехан кегийрхошлахь вуно чIогIа даьржина,шуьйра пайдаоьцуш бу, корта дIонгIаз боккхачу буьртигашкахь духкучу бен-бечу молханех а, уьш чу а кхуьссуш муьйлучу мерзачу а, тезачу а хишах а.

«Пхи-ялх бIе низамхо волчу цхьана урхаллехь нуй-горгамца цIано еш белхало ю сан шича. ХIора дийнахь чIурам тIоьрмиг буззий и энергохишийн шишанаш а, буьртиг молханийн беттанаш а дIахьокху ша боху цу кертара.» Ишта дуьйцу гIалахь оцу полисхойн урхаллина лулахь вехачу соьлжагIалахочо.

И магийна доцу,могушаллина Iаламат зене долчу молханех, хих чот йоцуш дукха кегийрхой марзбалар цхьаболучара дузу, хьалханча муфтият а йолуш, махкахь йий, чагIар, къаркъа, кхин маларш дохкарца луьра къийсам баллорца. И бахьанехь хьожа ца кхетчахьана бохуш шайн кара еа-еънарг муьйлу кегийцрхоша а, кхиазхоша а бохуш даре до лоьраша а, хьехархоша а, тIекхуьучу чкъуран бала мел кхочучара а. Уьш кхетац кхузахь кIоршаме низамаш талхор пачхьалкхан куьйгалхойн тидамза дисарх.

Комментареш

New Comments Available

Оха хьоьхург

XS
SM
MD
LG