ТIекхочийла долу линкаш

ЦIеххьана кхаьчна хаам!

Стаг а, лаьхьа а


СТАГ А, ЛАЬХЬА А

Новкъа воьдуш хилла цхьа стаг. ЦIе а летта йогачу кулла тIе кхаьчна иза. Оцу цIаро холчу хIоттийна, кIелхьарабала меттиг йоцуш бисна лаьхьа.

- КIелхьарабаккха беза аса хIара - аьлла, шегара гIама дIакховдийна некъахочо.

Цу тоьхула схьахьаьдда лаьхьа стеган логах хьаьрчина.

- Аса, цIаро багочуьра, кIелхьара ма-баьккхира хьо, хIунда во ахь со хIаллак, дIахеца со, - аьлла стага.

- Шена дика динчо бен вониг деш ца хуьла, жоп делла лаьхьано.

- Собар дехьа цкъа. ДIамалдехьа сан лаг, оцу боллучу къеначу ноже хоттур ду вайшиммо бакъ муьлхарг ду, я хьо, я со.

Лаьхьано стеган лаг малдина.

Стага ноже хаьттина:

- Аса хIара лаьхьа цIаро багочуьра кIелхьарабаьккхина. Суна баркалла аларан меттана сан логах а хьаьрчина со вен боллу хIара. ХIокхо йийриг харцо ю, я яц?

Ножо иштта жоп делла:

ХIокху шерачу арахь со цхьаъ бен дитт дац. Маьлхан товнехь гIелвеллачу некъахочунна садоIа IиндагIа латтадо аса. Сан IиндагIехь са а доIий: «Ма дика наж бу хьо» бохуш, суна тIера генаш кегдо, гIодах диг а детташ поттарчий йоха. Дика динчо бен вон ца до. Легаш а Iовдий, ве и стаг - аьлла ножо.

Лаьхьано стеган легаш Iаьвдина.

- Собар дехьа лаьхьа, ма вехьа со. Ма харцо ю ахьа йийриг. Ножо аьллачунна со реза вац. ДIогахь бежаш боллучу старе хоттур ду вайшиммо - аьлла некъахочо.

Лаьхьано стеган легаш малдина. ТIаккха старе хаьттина.

- Аса охана а до, мекха а боккху, кир а леладо. Iай а, аьхка а болх бо аса. Оццала со бацош схьавогIачу дас, шена даа жижиг дезчи уьйтIа юккъе охьа а тухий, логах урс а хьокхий боь. Шена дика динчо бен вониг ца до. Легаш а Iовдий ве иза!» - аьлла старо.

Лаьхьано стеган легаш Iаьвдина.

- Собар дехьа цкъа, дIогарчу цхьогале хатта вайшиммо? - аьлла стага.

Цхьогале дIадийцина стага лаьхьа ша кIелхьарабаккхар а иза шен логах хьарчар а.

Лаьхьано дIадийцина ножан дитто аьлларг а, старо аьлларг а .

ТIаккха цхьогало жоп делла:

- Акхаройн паччахь долчу лоьмо суд ян хIоттийна со. Стеган логах а хьаьрчина нийсонца кхел яр доьху ахьа. Цу тIехь хьо харц лоь. Лаг дIа а хеций, лаьтта охьабосса. ТIаккха шиммо а бакъдерг дуьйцур ду алий суна дуй баа. Цул тIаьхьа йийра ю аса нийсонца кхел.

Лаьхьа, стеган лаг дIа а хоьций, лаьтта охьабуссу. Иза лаьтта охьа ма боьсси цхьогало тIе ког а боккхий боь. «Кетаран кач бан ма дика хир яра хьан цIока!» шен дагахь олий цхьогална тоха шалгу ластайо стага. Цхьогал дIаэккхий кIелхьара долу.

- Хьо кIелхьара ваккхарна гIалат со а дели, - аьлла, цхьогало дедда ша юьстахдаьлчи.

XS
SM
MD
LG