ТIекхочийла долу линкаш

ЦIеххьана кхаьчна хаам!

Охьайолуш ю Путинан рейтинг


Путин Владимира Оьрсийчоьнан президентан даржехь бечу балхана реза бац 18 процент Оьрсийчура бахархой. Иштта жамI ду Левада-центро Дечкен-баттахь бинчу талламан. Цу кепара, кху тIаьхьарчу баттахь Оьрсийчоьнан президентан рейтинг охьаяьлла 6 процентана. ХIинца иза ю 82 процент.

Цуьнца цхьана, пачхьалкх нийсачу новкъа йоьдуш яц аьлла хетачу нехан терахь тIекхаьчна 34 процентана. Баханчу баттахь и терахь дара 27 процент. Оьрсийчоьнан Iедало бечу балхана реза бац 48 процент Левада-центран талламехь дакъалаьцна нах. Регионийн куьйгалхоша бечу балхана реза бац 47 процент бахархой.

Стохка Лахьан-баттахь ВЦИОМ олучу талламан центро шен талламан жамIаш довзийтинера. Цаьрца а догIуш, Путинан рейтинг яра 88 процент. ВЦИОМ-ерчу эксперташа дийцарехь, Оьрсийчоьнан президенто деш дерг къобул дечу нехан терахь уггаре а лакхадаьллера 2014-чу шеран бIаьста, Оьрсийчоьно ГIирма дIалаьцначул тIаьхьа.

2015-чу шеран ГIадужу-баттахь социологаш хаам бира Путина дийриг къобулдеш бу 90 процент бахархой аьлла. Цара дийцарехь, цу тайпа хьал доьзна дара Оьрсийчоьно Шемахь тIеман операци йолорца.

Комментареш

New Comments Available

Оха хьоьхург

XS
SM
MD
LG