Цхьаьнакхеттачу Къаьмнийн Вовшахтохараллан рогIера инарла секретар хира ву Португалин премьер-министр хилла Гутерриш Антониу. Reuters агенталло бинчу хаамца, Кхерамазаллин Кхеташонехь вето кхайкхо бакъо йолчу пхеа пачхьалкхах цхьа а пачхьалкх ца хилла Гутерришан кандидатурина дуьхьал.
Цхьаьнакхеттачу Къаьмнийн Вовшахтохараллан рогIера инарла секретар билгалвоккхуш формалан доцу 6-гIа кхажтасар хилира Кхаарин дийнахь. Официалан кепара рогIера инарла секретар хоржур ву тахана, Еарин дийнахь ГIадужу-беттан 6-чу дийнахь.
Цхьаьнакхеттачу Къаьмнийн Вовшахтохараллан рогIера инарла секретар хоржуш Iедал ду пхеъа шаранна, юха кхин цкъа и харжа аьтто а болуш.
Карарчу хенахь цун даржехь волчу Бан Ки Мунан шолгIа пхеъа шеран хан дIайоьрзуш ю 2016 шо чекхдолуш. Иза дуьххьара цу дарже хаьржинера 2007-чу шарахь.
Гутерриш Португалин премьер-министр хилла 1995-чу шарахь дуьйна 2002-чу шаре кхаччалц. 2005-чу шарахь дуьйна 2015-чу шаре кхаччалц иза вара Цхьаьнакхеттачу Къаьмнийн Вовшахтохараллан мухIажирашкахула волу комиссар.