Оьрсийчоьно вето кхайкхийна Цхьаьнакхеттачу Къаьмнийн Вовшахтохараллан кхерамазаллин кхеташонан резолюцина. Цуьнца а догIуш, доьхкуш дара Шемарчу Алеппо-гIалана тIехула тIеман кеманаш лелар.
Францино кечйина Британино гIортор йина и резолюци тIеоьцуш кхаж тесна кхерамазаллин кхеташонан 11 пачхьалкхо. Дуьхьал хилла Оьрсийчоь а, Венесуэла а. Кхин а ши пачхьалкх кхаж ца тосуш сецна.
Цхьаьнакхеттачу Къаьмнийн Вовшахтохараллан Кхерамазаллин Кхеташонан даиман а йолу декъашхо ю Оьрсийчоь ю, цундела цо дуьхьал кхаж тасар лоруш ду вето кхайкхор санна.
И документ дийцаре дале Францин президенто Олланд Франсуас дIахьедар дира цунна вето кхайкхийначу пачхьалкхо дерриг а дуьненан бIаьргашкахь шех тешам бойур бу аьлла.
Оьрсийчоьно кечйинера шен резолюцин проект - Алеппора тIемалой арабаха Iалашо йолуш. Амма цунна дуьхьал хилира Кхерамазаллин Кхеташонан 9 пачхьалкх. 4 - реза яра, ши пачхьалкх кхаж ца тосуш сецира.
