ТIекхочийла долу линкаш

ЦIеххьана кхаьчна хаам!

Даймахке 75 шаре бахбелла некъ


Дуьненан шолгIачу тIамехь вийначу нохчийн эскархочун декъан чалхаш кара а йина, лаьттах йоьхкина Нохчийчохь.

please wait

No media source currently available

0:00 0:03:53 0:00
Линкана тIе

75 шо даьллачул тIаьхьа цIаерзий Шеларчу вахархочун Сатуев Iусамин даьIахкаш ша ваьхначу эвла. Цигарчу кешнашкахь дIайоьхкина уьш.

Иза тIаьхьарчу новкъа ваккха баьхкина дуккха а нах бара: иза карийнарш а, Iедалан хуькматашкара а, гергарниш а.

Шен 25 шо долчу Сатуев Iусаман валар нисделла Ржев гIалин йистехь хиллачу тIеман тасадаларехь.

ДIавоьллина хилла эскархо хIетахь циггахь, кхечу салташца.

Ржев-ГIалин йистехь хиллачу тIамехь дукха нах байина дела, цигахь ницкъ ца кхаьчна мила-хьенан ву къаста а дина, церан гергарчаьрга хаам дIакхачо.

Цундела, хIинцалц Сатуев Iусама, лар йоцуш вайначарна юккъахь хилла, аьлла Маршо Радиога дийцира, Нохчийчоьнан тIеман комиссариатан белхахочо Хаджимурадов Ислама.

Хаджимурадов: «Ржев гIалахь ахкарш дечу хенахь даьIахкаш а карийна, коча уллуш йолу медальон хилла. Цу тIера йозанца къастийна иза мила ву. И даьIахкаш схьа а яьхна, Нохчийчоьнан тIеман коммисариате хаам а бина, шаьш иза а вахьаш догIур дара аьлла, хаам бина, схьа а баьхкина иштта дIавоьллира-кх иза».

75 шо хьалха тIамехь дIакхелхинчу Сатуев Iусаман гергарчу нахана дуьххьара дIа, боккха кхаъ хилла, цуьнан дакъа цIа а деъна дIадоллар. Иза дийна цIавирзича санна, ала мегар долуш, хазахетта шайна элира цуьнах вистхуьлуш цуьнан шичан кIанта Ладаев Iимрана.

Ладаев: «Дозалла а, кхаъ а бу-кх иза. ТIеваха кошан барз хилча а, Делан къинхетам бу-кх бохуш, оцу хьоле кхочу вай цкъацца. Онда хIума ду-кх иза, 75 шо даьлча, шен Даймахкахь иза дIаволлар».

Сатуев Iусаман вежарша а, кхечу гергарчу наха а, Совета заманахь дукха чIогIа лехнера иза велла меттиг, амма цхьанна а кепара гIуллакх ца хиллера церан.

Цундела, дог диллина ала мегар дара шайн иза карор ву аьлла кхин дIа а дийцира Ладаев Iимрана.

Ладаев: «Мичахь ву ца хууш, лар йоцуш вайна ву бохуш жоп лора, хеттарш дича официала Iедалша. Ржев гIалин герггахь хиллийла хууш дара. Циггахь йовш яра цуьнан лар. Ира а хIиттина, доккха ор чохь дIадоьхкинчу декъешна юккъахь карийна иза, бохуш дийцира-кх цигара баьхкинчу оьрсаша».

Дуьненан шолгIачу тIамехь 40 сов эзар стага дакъалаьцна хилла хилар даре до официала статистико.

Майраллийца, доьналлийца билгал а бевлла уьш. Эзарнашна тайп-тайпана мидалш елла тIеман хьуьнар гайтина аьлла.

Иттанашна тутрпалхойн мидалш хьакъ ю аьлла къастийна хилла. 5-нна бен тIом боьдучу хенахь яла а ца елла.

XS
SM
MD
LG