Нохчийчоьнан куьйгалхочо Кадыров Рамзана дIахьедина школа чекхъяккхарца боьзна синкъерамаш школашкахь дIабахьарна дуьхьал ву ша аьлла, уьш кечбеш шайн ахчанаш гулдан деза бохуш дай-наноша латкъамаш барна. Цунах лаьцна хаам бина Кадыровн зорбанан сервисо, яздо ТАСС агенталло.
"Соьга сих-сиха хьалха шерашкахь дай-наноша латкъамаш бора шайн бераша школа чекхъяккхарца йоьзна суьйре вовшахтухуш тайп-тайпана ахчанаш доьху бохуш" - аьлла республикан куьйгалхочо.
Школа чекхъяккхарца йоьзна синкъераман суьйренаш даима а хир ю, боху Кадыровс. Амма, цунна хетарехь, уьш хила еза школан кертал арахьа.
-И суьйренаш дIаяхьарх лаьцна сацамаш бийр бу дай-нанойн комитеташа а, шаьш школа чекхъяьккхина бовлуш болчу дешархоша а, - даладо Кадыровн дешнаш цуьнан зорбанан сервисо.
Кадыровна хетарехь, цу тайпа мероприятеш дIаяхьа мегар ду меттигерчу кафешкахь а, ресторанашкахь а.
Кху шарахь Нохчийн Республикехь школа чекхйоккхуш ву 7 418 дешархо.