ТIекхочийла долу линкаш

ЦIеххьана кхаьчна хаам!
please wait

No media source currently available

0:00 0:03:49 0:00
Линкана тIе

Шеконе дилла хьашто а йоцуш, карарчу хенахь Оьрсийчоьнан кIошташлахь уггаре а дукха заьIапхой болчу регионех цхьаъ ю Нохчийчоь. Къинхьегаман а, социалан хьелаш кхиоран а министаралло ши шо хьалха Iорадаьхначу терахьашца 175 эзар сов заьIапхой бу, шайлахь 61 эзар сов бер а долуш.

Оццу урхаллин маьхькIамхоша чIагIдарца, хIора шарахь республикехь заьIапхойн могIарш дукълуш, 10 эзар сов тIе а кхеташ, церан терахь лакхадолуш ду. Официалан гIардаьккхинчу терахьца махкахь 10% сов заьIапхой бу.

Царех коляска олучу ворданаш тIех бен дехьа-сехьа вала амал доцуш, виснарг ву, дуьззина доцчу терахьашца ши эзар сов стаг. Оццул уьш дукха белахь а, кIошташкахь, гIаланашкахь цхьа наг-наггахь доцург хаалуш вац куьйга тоттучу ворданахь заьIапхо.

Стенна? Цу хаттарна жоп кIелбисинчу нахана ара-чубовла. баха-бахка кхоьллина хьелаш цахиларца доьзна ду. Цу декъехь Нохчийчоь, говзанчаша а, шаьш бахархоша а билгалдоккхуш ма-хиллара, Оьрсийчохь уггар гIаддайначу кIоштех цхьаъ ю.

Масала тIекIалдинчу цIенош чохь, я Iедалан хьукхматашкахь къоьлла ю пандус олучу некъан. Вуьшта аьлча, дезаро охьатаьIIина латтош, баланех, эшамех доьттина ду цхьацца лазарца болчу бахархойн дахар.

Цомгаш йолчу йоIана дарба каро Европе кхача дагахь 5-6 бежана а йоьхкина новкъаяьлла Новр кIоштера Маликат эрна харж йина юхайирзина кху деношкахь. Шайгарчу хьолах дуьйцуш ю и ша.

Маликат: "ДТП, анемия цамгар ю йоьIан. Бежана пхи корта а боьхкина, Европе яха йоьллера со, амма бакъо ца елира дехьа яла. Квота елча а гIуллакх хир дац, кху Оьрсийчохь тхуна дарба карор дац аьлла. Ас Iедалдайшка гIо дехна аьлла кIоштан хьаькамаш схьа а баьхкина суна дов дира, хьуна дан гIо дац кхин кехат ма язделахь аьлла. Цигахь дозанал дехьа бен йоIана лоьралла леладойла доций а хаьа, делахь кхин гIо деш-м дац…"

Ткъе дейтта шо ду Соьлжа-гIалин кIоштера Юсупова лазарца йолу. Iедалера шайна хуьлчу гIоьнах а, шаьш шайн чоьтах заьIапхо Фаранце кхачаярх а дуьйцуш ю цуьнан йиша Лидан.

Лидан: "Сан йиша ворданна тIехь йисна 34 шо ду. И оха чекх ца йоккхуш меттиг йисна а яц. Хьалха санна тIаьхьа ида а ца дезаш, оьшуш мел долу хIума Iедало схьало. Кху сохьта Францехь ю иза. Шозза операции а йина цунна. амма кхин хийцамма-м бац. ХIинца кхиахь хIара мархийн бутт бале цIа кхачо хьовсур ду тхо".

Ког баькх-баьккхинчохь бахархоша дечу тоьшаллашца, Iедалера хуьлуш кхин дIоггара гIо а доцуш, гIийла дуьне дууш бу лазарца болу бахархой. Iедало царна,бан таро йолчунна а,болх хилийтархха-м дийцар а беламе ду.

Цу декъехь а цара шаьш туху шайна лол. Иштачех, куьйгашца лело зеразаьIнаш хIиттош, шен машен кеч а йина таксахо болх беш ву Теркйист кIоштера Ломаз юьртара Мурадов. И ву дуьйцуш.\

Мурадов: "Кхечара гIо даре хьежжехь со мацалла велла хир вара. ХIара машен ас айса кечйина-кх. ХIара еха зеразакъа тормоз ю куьйга озош. ДIогарниг муфта сцеплени олу коьчалла ю, ткъа хIара газ тIеяла боьгIна гIирс бу. Ткъа шо а сов ду ас ишта машен лелош йолу".

Махкарчу заьIапхойн дахар кесталгIа дикачу агIор хийцалур ду ала дегайовхо йоккха яц.

Дуьненан футболан чемпионат шайн цIахь дIахьош хиларе терра, Оьрсийчоьнан бахархоша сагатдо мехкан футболна. Шу дуй оцу декъах?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG