ТIекхочийла долу линкаш

2 шо 6 бутт арахь яккха хан кхайкхина яздархочунна-историкна Ибрагимов Ризванна Соьлж-ГIаларчу Октябрян кIоштан кхело.

И сацам бовзийтира сарахь 5 даьлча кхелхочо Налаева Хадижата. Цунна хетарехь, гIуллакх луьстуш мел теллина тоьшаллаш а, безказлонаш а дуьстича, яздархочун бехк бу Оьрсийчоьнан Бехктакхаман кодексан 282 артиклан 2-чу декъаца богIуш.

Бехкевийриг гонахарчу наха а, накъосташа а дика вуьйцуш хиларна, юкъараллана цунах кхерам бацарна, оццу кодексан 73 артикалца таIзар дай а деш, Ибрагимовна хан арахь яьккха магийна кхело.


Ша Ибрагимов Ризвана а, цуьнан адвокато Касумов Султана а къобал ца бина кхелан сацам. Низамо еллачу бакъонца Лаккхарчу кхеле аппеляци йийр ю шаьш, аьлла, комментари йира сацамах Ибрагимов Ризвана.


Ибрагимов Ризван бехкевора цо исторех язйинчу книгашкахь нохчийн къам ай а деш, жуьгтийн къам сийсаздо бохуш. Яздархочо иза аьттехьа а тIе ца дуьту. Цо бахарехь, стохка дIа а лаьцна, полицин декъехь ток а етташ хьийзийча дуьйна схьа ву иза Нохчийчоьнан лаккхарчу даржхойн омарица кхеле ийзош. Ибрагимов тешна ву, кхело баккхийчу хьаькамашна товш боллу сацам чекхбаьккхина хиларх.

XS
SM
MD
LG