Политикан а, экономикан а коммуникацийн агенталло (АПЕК) зорбане даьхна ша Мангал-беттан губернаторийн рейтинг толлуш бинчу талламан жамIаш. Цуьнца а догIуш, губернаторшна юкъахь хьалхаваьлла воьдуш ву Москох гIалин мэр Собянин Сергей. ШолгIачу меттехь ву Нохчийчоьнан куьйгалхо Кадыров Рамзан. КхоалгIа меттиг дIалаьцна Тюменан кIоштан губернаторо Якушев Владимира.
АПЕК-о хIоттийначу рейтингехь тIаьххьара меттиг дIалоцуш ву ГIалмакхойчоьнан куьйгалхо Орлов Алексей. Стигалкъекъа-баттахь дуьйна цуьнан рейтинг охьаяьлла 4 позицина.
Политикан а, экономикан а коммуникацийн агенталло шен талламехь юьхьарлаьцнарш яра, Оьрсийчоьнан президентан Путин Владимиран «прямая линия» цIе йолу телепередача йоьдуш бахархоша айина хилла регионан проблемаш.