Иракъера 12 стаг кIелхьарваьккхина шаьш аьлла хаам бина Кадыров Рамзана шен Инстагармерчу агIонехь. Цу хаамца а догIуш, "Иракъерчу Курдистанехь дIадерзийна йоккхачу гуманитаран операцин дакъа». Цуьнан чулацам бу Оьрсийчуьра а, СНГ-н пачхьалкхашкара а бахархой кIелхьарбахар.
И акци вовшахтоьхнарг вара Нохчийчоьнан куьйгалхочун Гергарчу Малхбалехь а, Къилбаседа Африкехь а волу векал сенатор Сабсаби Зияд, хаам бо Кадыровс.
Еарин дийнахь Иракъехь тIемалошкара схьаяьккхина хилла Тал-Афар олу меттиг. Цигара кхерамазалла йолчу метте дехьаваьккхина 12 стаг -- 6 Оьрсийчоьнан а, 6 Казахстанан а вахархо.