ТIекхочийла долу линкаш

ЦIеххьана кхаьчна хаам!

"Iедал хийцалур ду, бIаьвнаш юьсур ю..."


Цкъа 500 миллиард мах кхайкхийна, хIинца 1 миллиард долларе хьалабаьлла «Ахмат-Тауэр» бIов яран мах. Ткъа оьший-те иза бахархошна?

please wait

No media source currently available

0:00 0:03:39 0:00
Линкана тIе

Говзанчаша дийцарехь, Соьлж-ГIалахь бух ботта болийна «Ахмат Тауэр» бIов локхаллица а, йоккхаллица а, цу чохь кхуллучу таро-хьелашца а шех терниг кхин йоцуш, Оьрсийчохь хьовх, ерриге Европехь а тоьллачех тоьлла.

435 метар лекха, куьце, хазна-гIишло, стигал Iаьрше хир ю. Цуьнца цхьана йозаелла хир ю боху «Грозный Молл» цIе йолу йохка-эцаран, самукъадаккхаран цIентар шена чохь 150 сов туька а, исс ресторан, кафеш, исс зал йолу кино гойту хIусамаш, берашний, баккхийчарний лерина самукъадоккху майданаш а ишта кх. дIа а.

ХIун аьлла хета бахархошна, Соьлжа гIалахь лаххаре а 1 миллиард доллар механ гIишло йогIа йолаярх? Мел цхьаьнадогIу я мел морзахъдуьйлу махкахошна цу декъехь хетарг а, моьттург а?

Цу хеттаршна жоьпаш лоьхуш гучудолу могIарера махкахой шайна хетачуьнца, моьттачуьнца кхаа тобане бекъалуш хилар: цхьаболчара, гIишлош гуттаренна махкахь юьсур ю, цундела дела дика еш лору, шолгIачара, ахча дахьа меттиг йоцу дела дозаллина еш лору, ткъа кхоалгIачарна, уьш йича а ца йича бен дIа а дац. Соьлжа гIалахь куьце гIишлош яр юьхькIаме хетачех ву Умаров Къурайш.

"Хьешашна гергахь а юьхькIаме хир ду"

"ГIалахь и бIов еш а, кхин гIишлош яр а сунна чIогIа товш ду,- элира Къурайша. - Цхьаммо а дIаса а йоккхур яц, халкъана юьсур ю. Баьхкинчу хьешашна хьалха а вуно дика юхькIаме ду-кх мохк а, гIала а цIиньялар, хаза хилар а. Нехан са а ца дууш уьш еш елахь, гуттар а башха хир ду".

Ахча дахьа меттиг йоцу дела еш ю сел инзаре яккхий, лекха стигал-бохь гIишлош. И тайпа хьажам бу таксахо болх бечу Асхабов Бисланан.

"Ахчано йойтуш ю. Спонсорш бу бохург ас шеконца тIеоьцу, - боху Асхабовс. - ТIетаьIIина доккхуш а, духкуш а маьхкадаьтта ду. Нах –м дIа Iийр бара".

"Шайн шортта ахча долу дела еш ю"

Шена вон ца хета оццул тоьлла бIов-гIишлош Нохчийчохь югIуш, боху шлахочо Исаев ХIарона. Цунна гергахь, лаьтта тIехь мел кхоьллина хIума, берриге бахам-гIишлош гуттар а деха долчу къомана юьсур ю.

"Шортта ахча долу дела йо. Массо хIума а, даима а деха долчу къомана юьсур ю, цундела суна дика хета сайн махкахь бIаьрла гIишлош еш. Iедал а хийцалур ду. Исторехь масалш дукха ду.

Шаьш доладаьхначу латтанаш-колонешкахь дукхе дукха гIишлош, шахьарш йоьгIа колонизаторша. Царех хIун хилла? Бухарчу халкъашна йисна-кх. Уьш цхьаммо дIахьур ма яц. Изза хир ду кхузахь а". И къамел динарг ву Шелан кIоштера Исаев ХIарон.

"Адам а, дуьне а цецдаккха гIерта"

Туьйранашкахь санна еш ю гIишлош, и туьйранаш чекхдевлча хIун хир ду-м хаац бохуш шеконехь ву Новр кIоштера воккха стаг Висар-Паша.

"Дозаллина лелош хIуманаш ду. Шаьш-шайна кхоьллинчу туьйранашкахь бехаш бу цхьаберш, - дуьйцура Новр гIаларчу воккхачу стага Висар-Пашас. - 400 метар сов лекха бохург забар яц. Адам, дуьне цецдаккха гIерта. ГIан-набарш дIа а евлла самабевлча хIун хир ду-м ца хаьа".

Нахана зен-зулам а доцуш, адам а ца хьийзош еш елахь, мел йича а новкъа дац муьлхха а гIишло аьлла ойланца чIагIвеллачех ву Новр гIалара вахархо Халилов Зураб а.

"Кхин бала а, гIайгIа а ма елира кху дуьненахь и цара йо гIишлош бен,-бохура Халиловс.- Мегаш ду-кх цара уьш нах а ца хьийзаш еш елахь".

Соьлжа гIалахь Оьрсийчохь а, Европехь а тоьллачех тоьлла «Ахмат Тауэр» бIов йогIаро юкъаралле цхьа бехке боцу бекъамаш беънехь а, бес-бесар тIедахкарш деш, декхарш хIиттош, шайна тIеIаткъам ца бичахьана мегаш ду стигал Iаьршашка хьалаоьхуьйтуш гIишлош йогIар.

Шуна хетарг

Гайта комментареш

Хьенан бехкенна хилла Нохчийчохь "Хьалхара тIом"?

ХIара Iилманца нисбина кхаж бац. Жоьпаш деллачарна хетарг бен ца гойту кхо.

XS
SM
MD
LG