Оьрсийн версин Forbes журналан коьрта редактор Хлебников Пол верна бехкелору Дукузов Мохьмад схьавалар тIедожийна Украинана Оьрсийчоьнан Инарла прокуратурано.
"Украинан дозанехь лаьцна Дукузов кхеле озорхьама дIавехна Украинан Инарла прокуратуре Оьрсийчоьно", - аьлла, яздо "Керланаш" агенталло.
Цкъачунна Украинас жоп ца делла Оьрсийчоьнна.
Байначу беттан 20-чохь Маршо Радионо ядинера, оьрсийн журналист Хлебников Пол верна бехке лору Дукузов Мохьмад Киевехь лацарх. Оьрcийчоьнан чоьхьарчу гIуллакхийн министраллан официалан векало Волк Иринас бинера и хаам.
"Оьрсийн полисхоша дуьненаюкъарчу лехамашка ваьккхина 1978-чу шарера Дукузов лаьцна. Москохахь цхьа могIа нах байарна бехкевеш ву иза. Иштта цунна тIететтина Форбс олучу оьрсийн версин журналан коьрта редактор Хлебников Пол вер а",- аьлла Волка.
Украинан кхерамзаллан сервисаша хьалхо дIакхайкхийнера дуьненаюкъарчу лехамашкахь хилла ши Оьрсийчоьнан вахархо лаьцна шаьш аьлла. Царех цхьаъ ву Хлебников верна бехкевен Нохчийчуьра схьаваьлла вахархо.
2004-чу шарахь аьхка Москох редакци чуьра араволучу хенахь вийнера Хлебников. Журналист вер тIедожийнарг нохчийн тIеман буьйранча Нухаев Хож-Ахьмад ву, вийнарг Дукузов Мохьмад ву аьлла, зорбанашкахь цIерш ехира.
2006-чу шарахь Дукузов а, шеконашкахь лаьцна Вахаев Муса а, Садретдинов Фаиль а маьршаваьккхира кхело.
