Кадыров Рамзанан Инстаграм дIакъовларца доьзна, цунна гIортор еш, акци дIахьур ю нохчийн кегийрхоша. И хаам бина "Москоха дуьйцу" радиостанцига нохчийн кегийрхойн юкъараллан лидеро Тапаев Рустама.
Цо бахарехь, масех кеп ю цара юьхьараэцна – аккаунташ дIакъовлар цхьабоса я посташ язъяр Кадыровна гIо лоцуш.
"Мухха а гIо лоцур ду оха мехкан куьйгалхочун. ЧIогIа новкъадеана масарна а, цуьнан Инстаграмера аккаунт дIаяккхар. Тхох, кегийрхойх а хьакхаделла и", - аьлла Тапаевс.
Шоьтан Iуьйранна дуьйна къевлина ю Кадыров Рамзанан Фейсбукера а, инстаграмера а агIонаш. Ресурсан администрацино блок тоьхна аьлла Кадыровс.
"Диверсин кибертIелатар" ду аьлла и зорбан министро Умаров Джамбулата а.
Мехкан куьйгалхочун аккаунт схьаеллалц, бойокт а кхайкхош, дIакъевлина шайн аккаунташ парламентан спикеро Даудов Мохьмада а, некъан полицин куьйгалхочо, Кадыровн йишин кIанта Черхигов Идриса а.
