Цуьнан официалан векало Гиоргобиани Нинос тIаьххьара брифинг дIаяхьира, оцу операцех дерг дуьйцуш.
Цо бахарехь, ПIаьнказ-чIожерчу Дуисехь а, Омалохь а дIалаьцначеран бехк хилар гойтуш шортта тоьшаллаш ду.
Уьш берриш а, цулл хьалха Тбилисехь ша шена эккхийтар а деш, веллачу Чатаев Ахьмадца зIенехь а, уьйрашкахь а хилла, боху Гиоргобианис.
ПIаьнказахь лерина операци дIахьочу хенахь 19 шо долу Мачаликашвили Тамерлан коьртах герз кхетта лазаварна реза боцуш, меттигерачу бахархоша дуьхьалонан акци дIаяхьара цигахь.
Гиоргобиани Нинос и жима стаг Чатаев Ахьмадан гIуллакхна шен цIарах меттигерачу банкашкахь массийта чот йиллина хилла боху.
Цунна тоьшаллаш деш шортта видеош а, аудиош а ю дIаязйина къайлахчу сервисехь.
Цуьнах дуьйцу меттигерачу журналисто Мчедлишвили Звиада: "Видеокийсакаш яра къайлах яьхна. Царна тIехь гуш дара Мачаликашвили Чатаевн тобанехь хиллачу Оьрсийчоьнан бахархошца Борзиев ШоIипца а, Солтахматов Асланбекца а цхьана хилар.
Гуш дара иштта, Мачаликашвили базархула цаьрца лелаш, мобилан телефонаш оьцуш. Кхин хIума дацара цу тIехь, уьш цхьана хилар бен. Амма оцу видео тIехь къаьсташ дац, хууш хиллий Мачаликашвилина и нах муьлшабу, царна хIун лаьа а, уьш хIунда баьхкина а".
ПIаьнказахь и лерина операци дIаяхьар нийса дуй-даций бохуш дац. Шаьш цигарчу нохчаша бахарехь, масийта тобанашка бекъабелла бу нах. Цундела, цхьаболчеран хьокъехь и операци ян хан тоххарехь тIехьъяьллера аьлла, дийцира меттигерчу юкъаралхочо Идигов Iумара: "ПIаьнказахь и операци дIаяран бахьанаш хIун дара хьуна аьлча, бакъдерг дийцича, ян ца езаш йина а хир яцара цхьаболчеран хьокъехь.
Мила бехке ву-вац суна ца хаьа. Гуьржийн Iедало, прокуратуро шайгахь 100 сов диск ду боху, цаьрга ладоьгIна, иштта 13 том гIуллакхаш а ду боху шайгахь".
Мачаликишвили Тамерлан кху деношкахь кхечу пачхьалкхе дехьаваккха сацам бина Iедало. Цигахь цунна дарба хирг хиларна сатуьйсу кIентан гергарчара.
Амма схьагучу суьртаца иза метта а веана, кхетамчохь хилахь, цуьнга дан дуккха а а хеттарш хир ду гуьржийн Iедалан.
