ТIекхочийла долу линкаш

ЦIеххьана кхаьчна хаам!

Роналдос декъалвина Нурмагомедов толам баккхарца


"Матч ТВ" телеканалехь ийначу латарийн стилехь волчу латархочо Нурмагомедов Хьабиба дийцина, Мадридан "Реалан" футболисто Роналду Криштиана UFC чемпионатехь лата волавалале а, толам баьккхинчул тIаьхьа а телефонехула хаам баийтинера шега аьлла. "Латар хир долуш дуй аьлла, хоттуш яздира цо соьга юьхьанца. Цул тIаьхьа: "Со воккхаве хьо чемпион ваьлла" аьлла а яздира Роналдос соьга", - аьлла Нурмагомедовс.

Оьрсийчуьра ММА-н латархо Нурмагомедов Хьабиб чемпион хIоьттина UFC (Ultimate Fighting Championship) олучу латархойн чемпионатехь еарийн буса. Iамеркахо Яквинт Эла эшо аьтто баьлла цуьнан.

Оьрсийчоьнан хаамийн гIирсаша яздарехь, массо а суьдхоша толам дIабеллера Нурмагомедовна.

Нурмагомедов дуьххьарлера спортхо ву Оьрсийчуьра UFC чемпионан титул яьккхинарг (яйн йозаллан категори). 29 шо долчу Дагестанерчу спортхочо 26-зза толам баьккхина шен карьерехь - цкъа а эшна вац. Цуьнан цхьа латар дIадирзина толамхо билгалваккха аьтто а ца болуш.

Роналдоца шен кху Iай Инстаграмехь тасаделлера гергарло аьлла Нурмагомедовс. Чиллан-баттахь гар а нисделира цушиннан, вовшашна совгIаташ а деш. Нурмагомедовс португалцана чолан куй беллера, ткъа цо кхунна шен автограф йиллина, коч еллера.

XS
SM
MD
LG