Шемахь тIеман операцехь дакъалацначу "Адмирал Кузнецов" тIеман хIордан кеманна ремонт ян 60 миллиард сом дойур ду Iедалша. Цунах лаьцна хаам бина Интерфаксо, шен хьастана тIе а тевжаш. Дийцарехь, техникан Iалашо хIоттон оьшу кехаташ кечдина а, тIечIагIдина а девлла ду.
"Адмирал Кузнецов" цхьаъ бен доцу кеманаш лело крейсер ду Оьрсийчоьнан тIеман хIаваан флотехь. Иза дина даьллера 1991-чу шарахь. Крейсеран аьтто бу иттаннаш ракеташ а, бомбанаш а туху кеманаш лело.
2016-чу шарахь, вуно онда кIур а туьйсуш, Ла-Маншехула чекхделира Оьрсийчуьрчу Североморскера Шема доьду "Адмирал Кузнецов". Оьрсийчоьнан Iедалша тIе ца дитира и кема доьхна ду бохург, амма дIахьедар дира цунна тIаьхьо ремонт йийр ю шаьш аьлла.
Шемахь тIеман операцехь дакъалоцуш ши кема дуьйхира крейсеран палубана тIе охьахууш. Хьалхо хаамаш баьржира, "Адмирал Кузнецов" Шема хьажоран мах 7 миллиард сом бара аьлла.